सहकारीबाट झण्डै १३ लाख चोरी, सीसी क्यामराको डिभाइस पनि गायब

मोरङको लेटाङमा रहेको एकीकृत जनभावना बचत तथा ऋण सहकारी संस्थाको झण्डै १३ लाख रुपैयाँ चोरी भएको छ । लेटाङ नगरपालिका– २ फडानीमा मुख्य कार्यालयबाट ८ लाख ९० हजार ४ सय ४५ रुपैयाँ र खैरेनीमा रहेको शाखा कार्यालयबाट ३ लाख ९० हजार ५ सय ८५ रुपैयाँ चोरी भएको सहकारीका अध्यक्ष हेरम्भराज भट्टराईले जानकारी दिए । उनका अनुसार मुख्य कार्यालय र शाखा कार्यालयबाट गरेर १२ लाख ८१ हजार ३० रुपैयाँ चोरी भएको छ । 

सहकारीमा चोरी भएको समय खुल्न नसकेको र बुधवार बिहान मात्रै घटनाका बारेमा थाहा भएको अध्यक्ष भट्टराईको भनाइ छ । मुख्य कार्यालयभित्र तीनवटा गेट रहेका छन् ।  ‘एउटा गेटमा ४ वटासम्म ताला लगाइएको थियो,’ उनले भने, ‘सबै गेटको ताला फोडेर लगेको पाइएको छ । ‘सेफलक’ तोडेर रकम लगेको उनले बताए ।  चोरीमा संलग्नले ताला नै लिएर गएको उनको भनाइ छ । 

सहकारी प्रवेश गर्ने मुख्यसहित चारवटा गेटमध्ये मुख्य गेट छाडेर चोरीमा संलग्न व्यक्ति पर्खाल नाघेर सहकारीमा छिरेको उनले बताए । ‘एउटामा ४ वटासम्म ताला लगाएर गेटलाई दह्रो बनाइएको थियो । तर, ती सबै ताला तोडेर चोरी भएको छ । घटना निक्कै शंकास्पद छ । अनुसन्धानका लागि प्रहरीमा निवेदन दिएका छौ,’ उनले भने ।

सहकारीको पछाडि साइरनसहितको ताला भएको गेट पनि थियो । चोरीमा संलग्नले उक्त गेटलाई भने नचलाएको अध्यक्ष भट्टराईको भनाइ छ । 

उनका अनुसार शाखा कार्यालयमा भने ताला तोडेर मूल ढोका तथा चेन गेट फोड्दैभित्र छिरेर चोरी गरेको पाइएको छ । सहकारीमा गत वर्ष पनि चोरीको प्रयास भएको उनले बताए ।  

चोरीमा संलग्नले सीसीटीभी क्यामेराको डिभाइस नै लिएर गएको प्रहरीको भनाइ छ । चोरीमा संलग्नलाई पहिचान गरेर पक्राउ गर्नका लागि प्रहरीको विशेष टोली परिचालन गरिएको छ । 

घटनाको प्रकृति हेर्दा सहकारीका बारेमा सबै जानकारी राख्नेले नै चोरी गरेको हुनसक्ने प्रहरीको अनुमान छ । इलाका प्रहरी कार्यालय लेटाङका प्रहरी निरीक्षक (इन्स्पेक्टर) भीमलाल ओली नेतृत्वको टोलीले घटनाको अनुसन्धान गरिरहेको छ ।