पार्टी भित्रको अन्तरसंघर्षको फाइदा उठाउँदै नेकपा (एमाले)का नेता चेतनारायण आचार्य लुम्बिनी प्रदेशको मुख्यमन्त्री बनेका छन् । संसदीय दलका नेता लीला गिरीलाई अस्वाभाविक रूपमा पाखा लगाएर आचार्य लुम्बिनीको मुख्यमन्त्री बनेका हुन् । 

केन्द्रको भागबन्डाअनुसार लुम्बिनीको नेतृत्व एमालेले पाएपछि पार्टीका केन्द्रीय सदस्यसमेत रहेका ५६ वर्षीय आचार्य पहिलोपटक लुम्बिनीको मुख्यमन्त्री बनेका हुन् । 

आचार्यलाई प्रदेश प्रमुख अमिक शेरचनले संविधानको धारा १६८ को उपधारा (२) बमोजिम सोमबार मुख्यमन्त्री नियुक्त गरेका छन् । आचार्यलाई प्रदेशसभाको दोस्रो ठूलो दल कांग्रेससहित ५६ सांसदको समर्थन छ । आचार्य एमाले महासचिव शंकर पोखरेलनिकट हुन् । 

उनी अर्घाखाँचीमा पार्टीका निलम्बित सचिव टोपबहादुर रायमाझीसँग काम गरेका नेता हुन् । रायमाझीकै निर्वाचन क्षेत्र अर्घाखाँची १ (१)बाट लगातार दोस्रोपटक प्रदेश सभामा निर्वाचित भएका आचार्य प्रदेशसभामा दोस्रो तहका नेतामा पर्छन् । अर्घाखाँचीको सन्धीखर्क नगरपालिका–९ अर्घामा जन्मिएका नेताको अहिलेको बसाइँ जिल्ला सदरमुकाम सन्धीखर्कमा छ । 

वि.स.२०२५ मा अर्घाखाँचीको साविक अर्घा गाविसमा बाबा टीकाराम र आमा तारादेवीको ७ सन्तानमध्ये चौथौं सन्तानका रूपमा जन्मिएका आचार्य सन्धीखर्कमा बस्छन् । वि.स. २०३७ सालदेखि १२ वर्षकै उमेरमा पञ्चायत विरूद्धको आन्दोलनमा सहभागी भएर आचार्य राजनीतिमा होमिएका थिए ।

सामाजिक र राजनीतिक दुवै क्षेत्रमा सक्रिय आचार्य वि.सं २०४३ सालमा बुटवल बहुमुखी क्याम्पसमा पढ्दै गर्दै तत्कालीन अखिलको प्रारम्भिक इकाई कमिटीबाट राजनीति यात्रा अघि बढाएका थिए । आचार्य बहुदल आएपछि एमाले २०४७ मा अर्घाखाँचीको सदस्यता प्राप्त गरे । २०४८ मा जिल्ला सदस्य २०५५ मा एमाले अर्घाखाँचीको नेतृत्व गरी सचिव बने । त्यो बेला पार्टीको नेतृत्व सचिवले गर्ने व्यवस्था थियो । 

वि.स.२०६४ को पहिलो संविधानसभा निर्वाचनमा अर्घाखाँची क्षेत्र नम्बर १ बाट उम्मेदवार भए पनि विजयी हुन सकेनन् । २०६९ मा फेरि एमाले जिल्ला अध्यक्ष भएर पार्टी हाँके । एमालेको नवौं र दशौं महाधिवेशनमा केन्द्रीय सदस्य बने । अहिले एमाले केन्द्रीय सदस्य तथा दाङ इन्चार्ज छन् । अर्घाखाँचीमा जन्मिए पनि उनले प्रदेशभरको जनताको अवस्था र स्थिति बुझेका छन् । 

प्रदेशसभाको पहिलो कार्यकाल (२०७४) सालमा शंकर पोखरेल नेतृत्वको पहिलो  प्रदेश सरकारमा केही महिना आन्तरिक मामिला तथा कानून मन्त्री बनेका थिए । गिरी नेतृत्वको पहिलो ३ महिने कार्यकालमा आचार्यले ग्रामीण विकास मन्त्री भएर काम गरेका थिए । 

नवनिर्वाचित मुख्यमन्त्री आचार्यले २०७९ सालको चुनावमा  अर्घाखाँची १ (१)बाट निर्वाचित भएका हुन् । उनले प्रदेश सभा निर्वाचनमा तत्कालीन गठबन्धनबाट उम्मेदवार बनेका राष्ट्रिय जनमोर्चाका सागर केसीलाई ७४० मतान्तरले पराजित गरेका थिए । त्यो बेला एकातिर पार्टीभित्र अन्तरद्वन्द्व थियो भने अर्कोतिर ५ दलीय गठबन्धनका कारण चुनाव सहज थिएन । 

निर्वाचित भएपछि उनी लुम्बिनीमा सर्वसम्मत संसदीय दलको उपनेता भएका थिए । कार्यकालको २० महिनापछि केन्द्रमा कांग्रेस र एमालेको गठबन्धन बनेपछि आफ्नै पार्टीमा 'सिनियर' नेतालाई पाखा लगाएर आचार्यलाई लुम्बिनीको नेतृत्व गर्ने अवसर जुरेको हो । 

निवर्तमान मुख्यमन्त्री जोखबहादुर महरा नेतृत्वको सरकारमा उनले आर्थिक मामिला तथा योजना मन्त्री भएर काम गरे । कानून संकायमा स्नातक पूरा गरेका आचार्य पञ्चायत र तत्कालीन राजा ज्ञानेन्द्र शाहको शासनविरुद्ध लाग्दा पटक–पटक पक्राउ परेका थिए । 

उनी पार्टीको कुशल संगठन र विकासप्रेमी नेताको रूपमा आचार्य चिनिन्छन् । एमाले अर्घाखाँचीका अध्यक्ष पिताम्बर भुसालले आचार्य कार्यकर्ताले रुचाइएको नेता भएको बताउँछन् । इमान्दार र महासचिव शंकर पोखरेलनिकट रहेर काम गरेकोले उनी मुख्यमन्त्री बनेको एमाले अध्यक्ष भुसालले बताए । 

आफ्नै पार्टीका निवर्तमान मुख्यमन्त्री लीला गिरीसहित कांग्रेससहित नेतालाई मन्त्रिपरिषद्‌देखि संसद्सम्म चित्त बुझाएर अगाडि हिँड्नुपर्ने उनलाई चुनौती छ । 

यसअघिका मुख्यमन्त्रीले शुरूआत गरेका प्रदेश गौरवका आयोजनाको प्राथमिकता र आउँदा दिनमा अगाडि सार्ने विकास र जनतासँग जोडिएका कामले आचार्य भाबी राजनीतिक यात्रामा पनि अर्थ राख्छ । 

प्रदेशप्रति जनतामा देखिएको वितृष्णालाई कम गर्दै चुस्त र मितव्ययी ढंगले प्रदेशको काम गर्न आचार्यलाई अर्को दबाब पनि छ । काम गर्ने हुटहुटी भएका आचार्यले अब आन्तरिक र बाह्य सन्तुलन मिलाएर अघि बढ्नुपर्ने प्राध्यापक डा. खगराज शर्माले सुझाव दिए । 

लुम्बिनीले पहिलो ५ वर्षमा २ जना मुख्यमन्त्री पाएको थियो । पहिलो मुख्यमन्त्री एमालेका शंकर पोखरेल र त्यसपछि माओवादी केन्द्रका कूलप्रसाद केसी मुख्यमन्त्री बनेका थिए । 

दोस्रो कार्यकालको झण्डै २० महिनामा चार वटा मुख्यमन्त्री लुम्बिनीले पाइसकेको छ । शुरूआतमा गिरी, त्यसपछि कांग्रेस संसदीय दलका नेता डिल्ली चौधरी, त्यसपछि नेकपा माओवादी केन्द्र संसदीय दलका नेता जोखबहादुर महरा र अहिले फेरि आचार्य गरी चार वटा सरकार बनिसकेका छन् । प्रदेशसभाको शुरूआतआतदेखि सत्तमा रहेको माओवादी अब प्रतिपक्षमा पुगेको छ ।