ट्रंकलाइन विवादमा कुलमानको झुट : अदालतलाई ढाँटे कि लेखा समितिलाई ?

गत शुक्रबार प्रतिनिधि सभाको सार्वजनिक लेखा समितिमा नेपाल विद्युत् प्राधिकरणका प्रबन्ध निर्देशक कुलमान घिसिङले आफूसँग सबै उद्योगले प्रयोग गरेको विद्युतको तथ्यांक रहेको दाबी गरेका थिए ।

डेडिकेटेड र ट्रंकलाइनको प्रिमियम महसुलबारे विवाद चलिरहँदा लेखा समितिले प्राधिकरणसँग टीओडी (टाइम अफ डे) मिटरको तथ्यांक मागेको थियो ।

२०७२ देखि २०७७ सम्मको बीचमा उद्योगीहरूले विशेष सुविधा प्रयोग गरेको भन्दै प्राधिकरणले गत असार १० गते ६१ उद्योगलाई पेनाल्टीसहित ८ अर्बभन्दा बढीको बिल काटेको थियो ।

उद्योगीहरूले आफूले विशेष सुविधा नलिएको र लिएको भए त्यसको प्रमाण दिन प्राधिकरणलाई चुनौती दिएका थिए । त्यसलगत्तै ६ उद्योगमा लाइन काटियो ।

प्रधानमन्त्री केपी शर्मा ओली र विद्युत् नियमन आयोगको निर्देशनसँगै प्राधिकरणले बोर्ड बैठक बोलाएर काटिएका उद्योगमा लाइन जोड्ने निर्णय गरिसकेको छ ।

तर, प्राधिकरणले विभिन्न समयमा अदालतमा पठाएको पत्रमा भने टीओडी मिटरको तथ्यांक मेटिएको उल्लेख गरिएको छ ।

रिलायन्स स्पिनिङ मिलको मुद्दामा प्राधिकरणको कोशी प्रादेशिक कार्यालयले २०८० को असोज ११ गते सुनसरी जिल्ला अदालतलाई पत्र लेख्दै टीओडी मिटरको नयाँ डेटाले पुरानो डेटालाई प्रतिस्थापन गर्ने भएकाले उक्त अवधिको डेटा उपलब्ध गराउन नसकिने बताएको थियो ।

हेर्नुहोस् पत्र:

त्यस्तै, प्राधिकरणले मकवानपुर जिल्ला अदालतलाई पठाएको अर्को पत्रमा पनि टीओडी मिटरको रेकर्ड लामो समयसम्म नरहने भएकाले मेटिएको उल्लेख छ ।

२०८० को भदौ २३ गते शिवम् सिमेन्टको मुद्दा चलिरहँदा अदालतले प्राधिकरणसँग टीओडी मिटरको तथ्यांक मागेको थियो ।

हेर्नुहोस् प्राधिकरणले अदालतलाई लेखेको पत्र:

मकवानपुर र सुनसरी जिल्ला अदालतलाई टीओडी मिटरको तथ्यांक नभएको र मेटिएको जवाफ दिएका घिसिङले त्यसको विपरीत लेखा समितिमा भने आफूसँग बकाइदा प्रमाण रहेको बताएका छन् ।

लेखा समितिका एक सदस्यले लोकान्तरसँग भने, 'कुलमानले या त अदालतसँग झूट बोलेका छन्, या त लेखा समितिलाई ढाँटेका छन् । उनले समितिमा के बुझाउँछन्, त्यो हेरेर थप विश्लेषण गरौंला ।'

लेखा समितिले घिसिङलाई टीओडी मिटरको तथ्यांक पेश गर्न ५ दिनको समय दिएको छ । बुधबार साँझसम्म प्राधिकरणले उक्त तथ्यांक बुझाएको छैन ।

लेखा समितिका सचिव एकराम गिरीले बुधबार प्राधिकरणबाट केही नआएको बताए । 'आज आउने कुरा त हो, तर अहिलेसम्म केही आएको छैन,' उनले लोकान्तरसँग भने ।

प्राधिकरणका उपकार्यकारी निर्देशक मनोज सिलवालले बिहीबार मात्र तथ्यांक बुझाइने बताए ।

'सबै तयार गरेका छौं,' उनले लोकान्तरसँग भने, 'आज अबेला भइहाल्यो । अब भोलि लगेर बुझाउँछौं ।'

पढ्नुहोस्, यो पनि :
हातैले भरेको 'एक्सेल शीट'लाई कुलमानले टीओडी मिटरको तथ्यांक भनेपछि...