०९ साउन २०८३, शनिबार
समयमा उद्धार हुन नसक्दा ललितपुर महानगरपालिका वडा नम्बर– १४ कान्तिपुर कोलोनीनजिकै नख्खु खोलाले बगाएर ४ जना बेपत्ता भएका छन् ।
झण्डै एक घण्टासम्म उद्धारको पर्खाइमा जस्ताको टहरामाथि बसे पनि उनीहरूको उद्धार हुन सकेन । स्थानीयका अनुसार उनीहरू त्यहाँ वर्कशप चलाएर बस्दै आएका थिए ।
बेपत्ता हुनेमा २ पुरुष, १ महिला र १ बच्चा रहेको प्रहरीले जनाएको छ ।
ललितपुर– १४ का वडाध्यक्ष अमृतजंग महतले आफूहरूले उद्धारका लागि प्रयास गर्दागर्दै उनीहरूलाई खोलाले बगाएको बताए ।
आफूहरूसँग उद्धारका लागि स्रोत साधनको अभाव रहेको र जिल्ला प्रशासन तथा आफ्नै महानगरपालिकाबाट पनि उचित सहयोग पाउन नसकेको उनको गुनासो छ ।
समयमै हेलिकप्टरबाट उद्धार गर्न सकिएको भए उनीहरूलाई बचाउन सकिने अवस्था थियो ।
वडाध्यक्ष अमृतजंग महतको भनाइ उनकै शब्दमा :
यो परिवार वर्कशप चलाएर बस्दै आएको थियो । हिजो राति म आफैंले फोन गरेको थिएँ । वडाले नै यसअघि उहाँहरूलाई आवतजावत गर्न फलामको पुल हालिदिएको थियो ।
गएराति अवस्था के छ भनेर फोन गर्दा बाढीले पुल बगायो भनेका थिए । शायद त्यही पुल बगेकाले सुरक्षित स्थानमा जान सकेनन् ।
बिहान अरू मान्छेले बाढीको सतह बढ्यो भनेर फोन गरे । हत्तपत्त उठेर गएँ ।
नख्खु खोलामा बाढीको सतह निकै बढिसकेको थियो । ४ जना व्यक्तिहरू उद्धारको पर्खाइमा टहरोको जस्तामाथि (छानोमा) चढेर बसेका थिए ।
मैले र स्थानीयले सशस्त्र प्रहरीलाई फोन गर्यौं । नगर प्रहरी, प्रहरी सबैलाई बोलाइयो । केहीबेरमा इन्पेक्टरसहितको प्रहरी टोली आयो । सशस्त्र प्रहरीको टोली ढिला गरी आयो ।
यसबीचमा उपस्थित प्रहरी र स्थानीयले उद्धारका लागि मानिस फसेको ठाउँसम्म डोरी पुर्याएका थियौं । एक जनालाई हामीले डोरीमार्फत वारि ल्याउने प्रयत्न पनि गर्यौं ।
आधासम्म आएपछि डोरीले नधान्ने भयो । त्यसपछि फर्किनुभयो । उद्धारका लागि टायर खोजेर ल्याइयो । प्रहरीले दुईवटा लाइफ ज्याकेट पनि तयार गर्यो ।
हामीले आफ्नै हिसाबले रेस्क्युको प्रयास गर्दा एक घण्टा भइसकेको थियो ।
त्यो एक घण्टासम्म म आफू पनि फिल्डमै थिएँ । अकस्मात् टहरो भत्कियो । ९ बजेर ५ मिनेटतिर चारैजनालाई बाढीले बगायो । आँखैअगाडि ४ जना बगेको देख्नुपर्यो ।
रेस्क्युमा ढिलाइ हुँदा हामीले उनीहरूलाई वारि ल्याउन सकेनौं । ललितपुरका सीडीओलाई फोन गर्यौं, तर उहाँको फोन निरन्तर व्यस्त भइरह्यो ।
ललितपुरमै रहेको सेनाको राजदल गणमा खबर गर्यौं । कांग्रेसका सांसद उदयशमशेर राणालाई पनि फोन गरेर उद्धारका लागि माथिसम्म पहल गरिदिन भन्यौं । उहाँले कुरा भएको छ भन्नुभयो ।
उद्धारका लागि गुहार्नुपर्ने ठाउँ कतै पनि बाँकी राखिएन । सम्बन्धित ठाउँमा फोन गर्यौं । नगर प्रहरीको प्रमुखलाई फोन गर्यौं, तर हाम्रै नगर पनि समयमा आएन ।
धेरैबेरसम्म सशस्त्र प्रहरीको उपस्थिति नै भएन । हामी आफूले स्थनीय व्यक्तिहरूसँग मिलेर निरन्तरको वर्षाबीच भिजेरै उद्धारको प्रयत्न गर्यौं । तर, हाम्रो प्रयास सफल भएन ।
ठूलो विपतमा सीडीओले समन्वय गरेर प्रयत्न गरिदिएको भए यस्तो घटना हुने थिएन भन्ने लाग्छ । तर, सीडीओको फोन व्यस्तको व्यस्त भयो ।
हाम्रै महानगरमा पनि भन्यौ, तर समयमा केही रेस्पोन्स भएन । मानिसहरू बगाइसकेपछि १० बजेपछि माथि हेलिकप्टर घुमिरहेको छ ।
त्यो टहरामा बस्दै आएका ५ जनामध्ये एकजनाको उद्धार भएको छ । ४ जना बेपत्ता छन् ।
