३० असार २०८३, मंगलबार
मिर्गौला फेल भएका बिरामीलाई डायलाइसिस सेवा प्रदान गर्न कपिलवस्तुमा सामुदायिक डायलाइसिस सेन्टर सञ्चालनमा आएको छ ।
लुम्बिनी प्रदेशका मुख्यमन्त्री चेतनारायण आचार्यले बिहीवार एक कार्यक्रमबीच बाणगंगा–१ मा डायलाइसिस सेन्टरको उद्घाटन गरेका छन् ।
रोटरी क्लब अफ सेन्ट्रल बुटवल र रोटरी क्लब अफ सेन्ट्रल कपिलवस्तुको सहयोगमा गौतमबुद्ध सामुदायिक मुटु अस्पतालले कपिलवस्तुमा सामुदायिक डायलाइसिस सेन्टर सञ्चालनमा ल्याएको हो ।
यसअघि मिर्गाैला फेल भएका बिरामीले डायलाइसिस सेवा लिन जिल्लाबाहिर जानुपर्ने बाध्यता थियो । सेन्टरमा १० वटा डायलाइसिस मशिन राखिएसँगै अब त्यो बाध्यता हटेको छ । यहाँको क्षमता दैनिक ६० जना बिरामीलाई सेवा पुर्याउन सक्ने रहेको छ ।
पाँच करोड रुपैयाँको लागतमा डायलाइसिस सेन्टर स्थापना गरिएको गौतमबुद्ध सामुदायिक मुटु अस्पतालका अध्यक्ष एजाज आलमले जानकारी दिए । एकजना बिरामीले हप्ताको दुईदेखि तीनसम्म डायलाइसिस गर्नुपर्ने अवस्था रहेको डायलाइसिस सेन्टरले जनाएको छ ।
लुम्बिनी प्रदेशमा गौतमबुद्ध सामुदायिक मुटु अस्पतालले चारवटा डायलाइसिस सेन्टर सञ्चालनमा ल्याएको छ । दाङको लमही, पाल्पा, वालिङ्ग र कपिलवस्तुमा सामुदायिक डायलाइसिस सेन्टरबाट बिरामीले सुविधा लिँदै आएका छन् । चारवटा शाखा र एउटा अस्पताल गरी पाँचवटा स्वास्थ्य संस्थाबाट ५०० जनाले नियमित डायलाइसिस सेवा लिँदै आएका हुन् ।
सो अवसरमा मुख्यमन्त्री आचार्यले स्वास्थ्य सेवामा सुधार गर्न प्रदेश सरकारले सामुदायिक अस्पताल तथा स्वास्थ्य संस्थाहरूसँग सहकार्य गर्ने प्रतिबद्धता व्यक्त गरे ।
स्वास्थ्यमन्त्री खेमबहादुर सारू मगरले लुम्बिनी प्रदेशलाई स्वास्थ्य क्षेत्रमा नमूना बनाउने गरी सरकारले भूमिका बढाएको बताए ।
पूर्वस्वास्थ्यमन्त्री तथा प्रदेश सभा सदस्य विष्णु पन्थीले सामुदायिक स्वास्थ्य संस्थाहरूले नागरिकको स्वास्थ्य उपचारमा अतुलनीय योगदान पुर्याएको चर्चा गर्दै सरकारी क्षेत्रबाट सहयोगको हात अघि बढाउनुपर्ने बताए ।
