३० जेठ २०८३, शनिबार
नेपाली साहित्यका ‘विराट प्रतिभा’ भैरव अर्यालको स्मृतिमा स्थापित विभिन्न तीन प्रतिष्ठित पुरस्कार भैरव पुरस्कार गुठीले तीन अलग–अलग स्रष्टालाई प्रदान गरेको छ ।
गुठीले हालै काठमाडौंमा एक कार्यक्रम आयोजना गरी स्रष्टाहरूलाई नगद पुरस्कारसहित सम्मान गरेको हो ।
जसअनुसार यस वर्ष (विसं २०८१)को भैरव पुरस्कार हास्यव्यङ्ग्यकार लक्ष्मण गाम्नागेलाई प्रदान गरिएको छ । यो पुरस्कारको राशि १ लाख ११ हजार १ सय ११ रुपैयाँ रहेको छ ।
एक लाख १ हजार १ सय ११ रुपैयाँ राशीको भैरव वाङ्मय पुरस्कार भाषासेवी एवं वरिष्ठ कोषकार चूडामणि गौतमलाई प्रदान गरियो भने ५१ हजार १ सय ११ रुपैयाँ राशीको भैरव प्रतिभा पुरस्कार वरिष्ठ अभिनेत्री लक्ष्मी गिरीले प्राप्त गरिन् ।
पुरस्कार प्राप्तकर्ताहरूको नाम छनोट गर्न गुठीले साहित्यकार गोपाल बरालको संयोजकत्वमा साहित्यकारद्धय नरनाथ लुइँटेल र हरिकला उप्रेती सदस्य रहेको चयन समिति गठन गरेको थियो । पुरस्कृत स्रष्टाहरूमध्ये हास्यव्यङ्ग्य साहित्यमा गाम्नागेको योगदानबारे प्राध्यापक डा रामप्रसाद ज्ञवालीले प्रकाश पारेका थिए ।
त्यस्तै भाषिक क्षेत्रमा गौतमको योगदानबारे साहित्यकार ज्ञाननिष्ठ ज्ञवालीले चर्चा गरे । यसैगरी कलाकार गिरीको योगदानका बारेमा साहित्यकार मेनका पोखरेलले प्रकाश पारेकी थिइन् ।
सोही अवसरमा वरिष्ठ साहित्यकार एवं पत्रकार विजय चालिसेले भैरव अर्याल नेपाली साहित्यको हास्यव्यङ्ग्य साहित्यको ‘महारथी’ नै भएको धारणा राखे । भैरव पुरस्कार गुठीका अध्यक्षसमेत रहेका वरिष्ठ साहित्यकार एवं पत्रकार रोचक घिमिरेले गुठीले हास्यव्यङ्ग्य क्षेत्रमा योगदान गर्ने स्रष्टाबाहेक समग्र नेपाली साहित्य र कलाको उत्थानमा क्रियाशील स्रष्टालाई पनि पुरस्कृत गर्दै आएको जानकारी दिए ।
संविधानसभा सदस्य रामेश्वर फुयाल, साहित्यकार आरसी रिजाल, गुठीका सचिव वसन्त रिजाल लगायतले समुन्नत समाजको निर्माणमा साहित्यको भूमिकाबारे प्रकाश पारेका थिए । कार्यक्रममा व्यङ्ग्य कवि तथा गजलकारहरूले ‘चोटिला’ कविता तथा गजल प्रस्तुत गरेका थिए ।
सोही अवसरमा साहित्यकार स्व रमेश विकलको व्यङ्ग्य रचनामा आधारित कृति ‘अब अगाडि बढ्नु छ, अझ अगाडि’को दोस्रो संस्करण सार्वजनिक गरिएको थियो ।
