ब्रिटिस एजुकेशन ग्रुप अन्तर्गतको द ब्रिटिस कलेजमा ‘टीबीसी करिअर फेस्ट–२०२४’ सम्पन्न भएको छ । सोमबार र मंगलबार थापाथलीस्थित कलेज परिसरमा ‘ग्रोथ सेलर्स’सँगको सहकार्यमा करिअर फेस्ट गरिएको हो । 

कलेजका विद्यार्थीहरू मात्रै नभई स्थानीय प्रतिभाहरूलाई अवसर प्रदान गर्ने उद्देश्यले आयोजना भएको कार्यक्रममा ७५ भन्दा बढी प्रतिष्ठित राष्ट्रिय तथा बहुराष्ट्रिय कम्पनीहरूको सहभागिता रहेको थियो । 

सहभागी कम्पनीहरूले १ हजार ७०० भन्दा बढी विद्यार्थीसँग ‘जब इन्टरभ्यू’ लिए । उनीहरूमध्ये १ हजार १४० जना विद्यार्थी विभिन्न ७४ वटा कलेजका विद्यार्थी थिए ।

कार्यक्रमको औपचारिक शुरूआत ब्रिटिस कलेजका म्यानेजिङ डाइरेक्टर महेन्द्र राज कँडेलले स्वागत मन्तव्य राख्दै गरेका थिए । त्यसपछि प्रतिष्ठित कम्पनीका प्रतिनिधिहरूले सहभागीहरूलाई विभिन्न सेसनमार्फत व्यावहारिक जानकारी समेत प्रदान गरे ।

यसैक्रममा एसियन पेन्ट्स नेपालका हेड अफ ह्युमन रिसोर्स श्याम कृष्णनले प्रविधिले रोजगारको क्षेत्रमा पारेको प्रभावबारे आफ्ना धारणा राखे । आईएमई ग्रुपका निर्देशक निशान ढकालले भने करिअर निर्माणको लागि व्यावहारिक सुझाव प्रदान गरे । 

कार्यक्रमको दोस्रो दिन प्लान इन्टरनेशनल नेपालका एचआर म्यानेजर प्रशंसा सुवेदीले ‘रोजगारीको पहुँच विस्तार र अवसरलाई नेपालमा कसरी प्रवर्द्धन गर्ने’ शीर्षकमा आफ्ना धारणा राखिन् । सुवेदीले रोजगारीको क्षेत्रमा रहेका समस्या उजागर गर्दै समाधानका उपाय समेत प्रस्तुत गरिन् । 

‘नेपालमा भविष्यको रोजगारः र एआईले रोजगारी ट्रेण्डलाई कसरी पुनःआकार दिँदैछ’ भन्ने विषयको प्यानल छलफलमा ग्लोबल आईएमई बैंकका उपकार्यकारी निर्देशक सुमन पोखरेल, क्लाउड फ्याक्ट्रीका कन्ट्री म्यानेजर प्रशान्त पोखरेल र लोटस होल्डिङ्सका प्रमुख कार्यकारी अधिकृत अजीत शाह सहभागी भए । 

ब्रिटिस कलेजका डेपुटी प्रिन्सिपल डा.प्याट्रिक म्याक्रुडेनले प्रविधिको सदुपयोग गरेर नेपालमा नै अवसर सिर्जना गर्नुपर्ने कुरामा जोड दिए । एआईले मानिसको काम नखोसेको बरु एआईको प्रयोगबाट उत्पादन क्षमता बढाउन सकिने उनको भनाइ छ । 

‘टीबीसी करिअर फेस्ट– २०२४’ नेपालका उत्कृष्ट प्रतिभाहरू देशमै राख्ने र उनीहरूलाई देशभित्रै वृद्धि र विकासको अवसर प्रदान गर्ने मञ्च भएको उनको भनाछ छ । प्यानल डिस्कसनको सञ्चालन भने ग्रोथ सेलर्सकी सीओओ रचिका करण्जितले गरेकी थिइन् । 

सहभागी रोजगारदाताहरूले ब्रिटिस कलेजको करिअर फेस्टको गुणस्तर र यसले विस्तार गरेको पहुँचको  प्रशंसा गरे । नेपालमा रिक्रुटमेन्टको नयाँ मापदण्ड स्थापित गर्न कलेजको भूमिका अहम् रहेको सहभागी कम्पनीहरूको प्रतिक्रिया छ । 

त्यस्तै, अवसरको खोजीमा रहेकाहरूले पनि सकारात्मक प्रतिक्रिया दिँदै आफूहरूको सम्भावनालाई सही आकार दिन फेस्ट फलदायी भएको बताए । 

‘टीबीसी करिअर फेस्ट– २०२४’ स्थानीय अवसरहरूको प्रवर्द्धन, रोजगारी बजारका चुनौतीहरूको समाधान र आगामी पुस्ताका प्रोफेशनलहरूलाई प्रेरित गर्न महत्त्वपूर्ण कदमका रूपमा खडा भएको कलेजको विश्वास छ ।