३० असार २०८३, मंगलबार
अख्तियार दुरुपयोग अनुसन्धान आयोगले रौतहटको चन्द्रपुर नगरपालिकाका तत्कालीन प्रमुख प्रशासकीय अधिकृत कृष्ण प्रसाद सिग्देल र लेखा अधिकृत कीर्तिराज सुवेदीलाई विशेष अदालतले दिएको आंशिक सफाइको फैसलाविरुद्ध सर्वोच्च अदालतमा पुनरावेदन गरेको छ।
विशेष अदालतले अदालतले ठेक्का सम्झौतासम्बन्धी अनियमितता प्रकरणमा प्रमुख प्रशासकीय अधिकृत सिग्देल, लेखा अधिकृत सुवेदी र आशिक कन्स्ट्रक्सनका सञ्चालक राम विनोद राउत बरैलाई आरोप दाबी पुग्न नसक्ने ठहर गर्दै सफाइ दिएको थियो ।
विशेषले २०८१ वैशाख ३१ गतेको फैसलाबाट उनीहरूलाई आंशिक सफाइ दिएको भन्दै आयोगले बिहीबार सर्वोच्च अदालतमा पुनरावेदन गरेको हो ।
अख्तियारले ठेक्का सम्झौताको कार्यान्वयनमा आर्थिक अनियमितता भएको, तोकिएको समयसीमाभित्र राजस्व दाखिला नगरिएको र अवैध उत्खनन्का कारण नगरपालिकालाई राजस्व नोक्सानी पुर्याइएको ठहर गर्दै पुनरावेदन दायर गरेको जनाएको छ।
विशेष अदालतको फैसलामा नगरपालिकाले असुल्नुपर्ने रकममध्ये ७ लाख असुली भएको बाँकी रहेको १७ लाख ६८ हजार समेत असुल गर्न नगरपालिकाबाट कारबाही चलाएको देखिन आएकाले उनीहरूले आरोप दाबी बमोजिमको कसुर गरेको देखिन नआएको भन्दै आंशिक सफाइ दिएको थियो ।
तर, अख्तियारले ठेक्का सम्झौतामा तोकिएकोभन्दा बढी परिमाणमा नदीजन्य पदार्थ उत्खनन् गरिएको पुष्टि भएकाले राजस्व चुहावट प्रकरणमा सफाइ दिने फैसला त्रुटिपूर्ण भएको जनाएको छ।
