०८ साउन २०८३, शुक्रबार
प्रेम प्रस्ताव अस्वीकार गर्दा बुटवलमा शनिबार बिहानै एक युवतीमाथि गोली प्रहार भएको छ । रुपन्देहीको बुटवल उपमहानगरपालिका–११ बुद्धनगरमा सामान्य खाजा घर सञ्चालन गर्दै आइरहेकी टीका विष्ट क्षेत्रीलाई सितारे आलम भन्ने युवकले गोली प्रहार गरेका हुन् । उनीहरू केही समय अगाडि मात्रै चिनजान भएको खुलेको छ ।
पाल्पाको रैनादेवी छहरा गाउँपालिका घर भई बुद्धनगरमा होटल चलाउँदै आएकी २९ वर्षीया विष्टलाई आलमले आफूसँग बिहे नगरे ज्यानको खतरा रहेको भन्ने धम्की दिने गरेका थिए ।
इलाका प्रहरी कार्यालय, बुटवलका प्रमुख डीएसपी ईन्द्रबहादुर रानाले पीडित युवतीको भनाइअनुसार प्रेम प्रस्ताव स्वीकार नगर्दा गोली हानेको अनुमान गरिएको बताए । ‘आफूसँग बिहे नगरे जे पनि गर्न सक्छु भनेर भिडियो कल गर्दो रहेछ,’ डीएसपी रानाले लोकान्तरसँग भने, ‘भिडियो कलमा पनि डर र धम्की दिँदै आइरहेको रहेछ । त्यसको स्किनसर्ट पीडित युवतीबाट हामीले पाएका छौं । प्रेमकै कारण यो घटना भएको हाम्रो अहिलेसम्मको अनुमान हो ।’
आलमले यसअघि पनि टीकालाई जबर्जस्ती लैजान खोजेको खुलेको उनले बताए । ‘यस अघि पनि युवतीलाई लैजाने कोशिश गरिरहेको रहेछ । पीडित युवतीले त्यो युवकको नाम सितारे आलम भएको बताएकी छन,’ डीएसपी रानाले थपे ।
जिल्ला प्रहरी कार्यालय, रुपन्देहीका प्रहरी प्रवक्ता डीएसपी सुरज कार्कीले युवती र गोली हान्ने युवकबीच पहिलेदेखि नै भेटघाट हुने गरेको स्थानीयले बताएका जानकारी दिए । ‘हामी युवकलाई खोजिरहेका छौं,’ डीएसपी कार्कीले लोकान्तरसँग भने, ‘नजिकैको होटलमा एउटा रेडबुल खाएर गएको रहेछ । उनीहरू भेटघाट भएको केही मिनेटमै गोली हानेर फरार भएको छ ।’
गोली हान्ने युवक भारतीय रहेको प्रहरीको अनुमान छ ।
गोली लागेकी युवती बोल्न सक्ने अवस्थामा रहेकी र स्वास्थ्य स्थिति खतरामुक्त रहेको छ । साथै उनको अप्रेशन गर्ने तयारी भइरहेको छ । ‘युवतीको अवस्था खतरामुक्त छ, उनले कारण खुलाउँछिन् भन्ने हामीले आशा गरेका छौं,’ कार्कीले थपे ।
टीका र आलमको कसरी भेटघाट तथा चिनजान भयो भन्ने एकिन भएको छैन । गोली चलाउनेजस्तो गम्भीर अपराधविरुद्ध रुपन्देही प्रहरी संवेदनशील रूपमा अघि बढिरहेको प्रहरी बताउँछ ।
