०५ साउन २०८३, मंगलबार
लायन्स क्लब अफ काठमाडौं बबरमहलले सिंगापुर र भारतमा रहेका लायन्स क्लबहरूसँगको संयुक्त सहकार्यमा तिलगंगा आँखा अस्पतालको समन्वयमा काठमाडौंस्थित मानव सेवा आश्रममा एकदिने निःशुल्क आँखा शिविर आयोजना गर्ने भएको छ ।
यो शिविर २०८२ बैशाख ११ गते बिहीबार बिहान ११ बजेदेखि दिउँसो ४ बजेसम्म सञ्चालन हुनेछ ।
मानव सेवा आश्रममा आश्रित व्यक्तिहरूको आँखा जाँच गरिने यो शिविरमा चिकित्सकको सल्लाहअनुसार आवश्यक पर्ने चस्माहरू निःशुल्क वितरण गरिनेछ ।
साथै, आँखासम्बन्धी अन्य आवश्यक उपचार पनि निःशुल्क प्रदान गरिने लायन्स क्लब अफ काठमाडौं बबरमहलले जनाएको छ ।
यो सेवामूलक कार्यले आश्रममा रहेका बेसहारा र असहाय व्यक्तिहरूको स्वास्थ्य सुधारमा महत्त्वपूर्ण योगदान पुर्याउने अपेक्षा गरिएको छ ।
लायन्स क्लब अफ काठमाडौं बबरमहलका प्रतिनिधि लायन तारा प्रसाद मैनालीले यो शिविरले सामाजिक सेवाप्रति क्लबको प्रतिबद्धतालाई झल्काउने बताए ।
उनले भने, 'हामीले मानव सेवा आश्रममा रहेका व्यक्तिहरूको आँखा स्वास्थ्यलाई प्राथमिकता दिँदै यो शिविर आयोजना गरेका छौं । तिलगंगा आँखा अस्पतालको विशेषज्ञ टोली र अन्तर्राष्ट्रिय लायन्स क्लबहरूको सहयोगमा यो कार्यक्रम प्रभावकारी हुने विश्वास छ ।'
यो शिविरमा सहभागी हुन र निःशुल्क आँखा जाँच तथा उपचार सेवा लिन मानव सेवा आश्रममा रहेका व्यक्तिहरूलाई आह्वान गरिएको छ ।
आयोजकले यो सेवामूलक कार्यलाई सफल बनाउन सबैको सहयोग र सहभागिताको अपेक्षा गरेको छ । थप जानकारीका लागि लायन तारा प्रसाद मैनाली (९८४१३९५९८०) लाई सम्पर्क गर्न सकिनेछ ।
