२७ असार २०८३, शनिबार
युवा तथा साना व्यवसायी स्वरोजगार कोषमार्फत् लगानी भएको १ अर्ब २२ करोड रूपैयाँभन्दा बढी रकम भाखा नाघ्दा पनि असुल नभएको पाइएको छ ।
बुधबार महालेखापरीक्षकको ६२ औं वार्षिक प्रतिवेदनले कोषबाट भएको १ अर्ब २२ करोड ६७ लाख ९८ हजारको लगानीको भाखा नाघेपछि असुल गर्नुपर्ने देखाएको हो ।
प्रतिवेदनले १ हजार २३९ सहकारी संस्थाबाट २०८१ असार मसान्तसम्म १ अर्ब ६ करोड ८५ लाख ९१ हजार साँवा तथा सोमा लाग्ने ब्याज १२ करोड ८१ लाख १९ हजार र हर्जाना ३ करोड ८८ हजारसमेत कूल १ अर्ब २२ करोड ६७ लाख ९८ हजार असुल गर्नुपर्ने देखाएको छ ।
त्यसैगरी १५ बैंक तथा वित्तीय संस्थाबाट लिनुपर्ने साँवा ३१ करोड ५३ लाख ३३ हजार बाँकी रहेकोमा ब्याज तथा हर्जानाको गणना गरी अभिलेख नै नराखेको प्रतिवेदनले खुलाएको छ । प्रतिवेदनले सम्झौताअनुसार हिसाब यकिन गरी साँवा, ब्याज तथा हर्जाना रकम असुल गर्न भनेको छ ।
युवा तथा साना व्यवसायी स्वरोजगार कोष (सञ्चालन) नियमावली, २०७७ को नियम १६ मा कर्जा लगानी गर्ने व्यवस्थाअनुसार कोषमार्फत् लगानी भएको रकम तोकिएको तालिकाअनुसार नबुझाउने तथा रकम दुरुपयोग गर्ने ऋणीलाई थप २ प्रतिशत ब्याज लाग्ने उल्लेख छ ।
