अमेरिकी राष्ट्रपति डोनाल्ड ट्रम्पले अवैध आप्रवासीविरुद्ध गरिएको छापा र त्यसपछि लस एन्जलसमा भड्किएको अशान्तिलाई नियन्त्रणमा लिन २ हजार नेशनल गार्ड तैनाथ गरेका छन् ।

क्यालिफोर्नियाको उक्त शहरमा शनिबार दोस्रो दिन पनि तनाव जारी रहेको थियो । जहाँ मूख्यतः लाटिनो समुदायको बसोबास रहेको क्षेत्रमा आप्रवासन तथा भन्सार प्रवर्तनका संघीय अधिकारीहरूसँग झडप भएको थियो । प्यारामाउन्ट जिल्लामा भीड तितरबितर पार्न अश्रुग्यास र लाठीको प्रयोग गरिएको थियो ।

आईसीईको अभियानका कारण यसै साता लस एन्जलसमा ११८ जना पक्राउ परेका छन्, जसमध्ये ४४ जनालाई शुक्रबार पक्राउ गरिएको हो । गभर्नर गेभिन न्युसमले यस्ता छापालाई ‘क्रूर’ भन्दै आलोचना गरेका छन् ।

शनिबार ट्रम्प र न्युसमबीच करिब ४० मिनेट फोन संवाद भएको गभर्नरका प्रवक्ताले सीबीएस न्यूजलाई बताए । थप विवरण भने सार्वजनिक गरिएको छैन ।​​

प्यारामाउन्ट अहिले केही शान्त देखिए पनि प्रदर्शनकारी र सुरक्षाकर्मीबीच झडप अझै भइरहेका छन् ।​ प्यारामाउन्टमा ८० प्रतिशतभन्दा बढी जनसंख्या हिस्पानिक समुदायको छ।