लामो समयदेखि ‘सुतिरहेको राजकुमार’ भनेर चिनिएका साउदी अरबका राजकुमार अल वालिद बिन खालिद बिन तलाल अल सउदको निधन भएको छ । उनी करिब दुई दशकदेखि कोमामा थिए ।

राजकुमार अल वालिद सन् १९९० को अप्रिलमा जन्मिएका हुन् । उनी राजकुमार खालिद बिन तलालका जेठा छोरा तथा चर्चित साउदी अर्बपति प्रिन्स अल वालिद बिन तलालका भतिजा थिए ।

उनी सन् २००५ मा लन्डनमा सैनिक तालिम लिँदै गर्दा भएको एक गम्भीर सवारी दुर्घटनामा परेका थिए । त्यस दुर्घटनाबाट मस्तिष्कमा गम्भीर चोट र आन्तरिक रक्तस्राव भएपछि उनी कोमामा पुगेका थिए । त्यसयता उनी कहिल्यै पूर्ण रूपमा होसमा आउन सकेनन् । अमेरिकन र स्पेनी विज्ञ चिकित्सकहरूको टोलीले निकै प्रयास गरे पनि उनको अवस्था उस्तै रह्यो ।

बुबाको अपार समर्पण
राजकुमार अल वालिदको उपचारमा उनका बुबा राजकुमार खालिद बिन तलालले ठूलो समर्पण देखाएका थिए  । उनले सधैं ‘ईश्वरको चमत्कारले छोराको स्वास्थ्य फर्कन्छ’ भन्ने विश्वास राखे ।

परिवारले समय–समयमा सार्वजनिक गरेका भिडियोहरूमा अल वालिदले कुरान पाठको ध्वनीमा केही शारीरिक प्रतिक्रिया जनाएका देखिएका थिए । यिनै झलकले धेरैको मन छोएका थिए ।

निधनपछि देशभर शोक
साउदी अरबको एक विशेष मेडिकल सेन्टरमा उनको निधन भएको जानकारी सार्वजनिक भएपछि ‘#SleepingPrince’ ह्यासट्यागसहित हजारौं व्यक्तिले सामाजिक सञ्जालमार्फत् श्रद्धाञ्जली अर्पण गरेका छन् । उनको निधनले साउदी समाजमा गहिरो भावनात्मक प्रभाव पारेको छ ।

उनको अस्पताल कक्ष नै एक प्रकारको आध्यात्मिक तीर्थस्थलजस्तै बनेको थियो, जहाँ नियमित रूपमा आफन्त, धर्मगुरु र सर्वसाधारणले प्राथना र भेटघाट गरिरहेका हुन्थे ।

राजकुमार अल वालिदको जीवनले केवल एउटा दुर्भाग्यपूर्ण दुर्घटनाको कथा मात्र होइन, एक बुबाको अपार माया, धार्मिक आस्था र परिवारको धैर्यको गहिरो चित्र प्रस्तुत गर्छ । उनको जीवन संघर्षले विश्वभरिका मानिसलाई सहानुभूति र श्रद्धा प्रकट गराउने अवसर दिएको छ ।

उनको निधनसँगै साउदी अरबमा एउटा दुर्लभ, भावनात्मक यात्राको समापन भएको छ ।