२९ असार २०८३, सोमबार
साहस ऊर्जा लिमिटेडले आफ्नो नाफा दोब्बर पुर्याएको छ ।
कम्पनीले सार्वजनिक गरेको चौथो त्रैमासिक वित्तीय विवरणअनुसार गत आर्थिक वर्षमा खुद नाफा ९० करोड २७ लाख रुपैयाँ पुगेको हो ।
अघिल्लो वर्ष सोही अवधिमा यो नाफा ४२ करोड ३ लाख रुपैयाँ मात्र थियो।
विद्युत् बिक्री आम्दानी बढ्नुका साथै बैंकको ब्याज पनि घटेकाले नाफामा उछाल आएको हो ।
विवरणअनुसार कम्पनीले गत वर्ष २ अर्ब ६४ करोड रुपैयाँको बिजुली बिक्री गरेको छ, जुन अघिल्लो वर्षको २ अर्ब ४४ करोड रुपैयाँभन्दा बढी हो।
त्यस्तै, वित्तीय लागत अघिल्लो वर्षको १ अर्ब १६ करोड रुपैयाँबाट घटेर गत वर्ष ८० करोड ५ लाख रुपैयाँमा सीमित भएको छ।
कम्पनीको वार्षिक प्रतिसेयर आम्दानी (ईपीएस) २३ रुपैयाँ ८८ पैसा र प्रतिशेयर नेटवर्थ १८४ रुपैयाँ पुगेको छ।
साहस ऊर्जाले ३४१ मेगावाटको बुढीगण्डकी जलविद्युत् आयोजनामा निर्माण गर्ने कार्य अगाडि बढिसकेको पनि जानकारी दिएको छ ।
त्यसका लागि फिल्डमा कर्मचारी खटिसकेको कम्पनीले जनाएको छ । हालै मात्र कम्पनीले निजी क्षेत्रकै ठूलो उक्त आयोजनामा लगानी जुटाएको थियो ।
हाल कम्पनीको सेयर मूल्य प्रतिकित्ता ६७६.१० रुपैयाँमा कारोबार भइरहेको छ ।
