तीज पर्वमा रातो साडी लगाएर माइतीघरको आँगनीमा नाच्ने, दिदीबहिनीसँग भेटघाट गर्ने, दर खाने र भगवान शिवको आराधना गर्ने हिन्दू महिलाहरूको परम्परा हो । यो पर्व हिन्दू महिलाहरूको विशेष पर्व हो । यो संगीत र साधनाको पर्व पनि हो । 

यही हरितालिका (तीज)को अवसर पारेर  गायिका पुनम गुरुङको आवाज रहेको तीजको गीत ‘ए साथी संगी हो’को लिरिकल भिडियो सार्वजनिक भएको छ । 

यस गीतका गीतकार गणेश उप्रेतीले आफ्नै युट्युब च्यानल एरिना इन्टरटेन्टमेन्टमार्फत् बिहीबार सार्वजनिक भएको हो । करुणा कँडेलको निर्माण रहेको यस गीतमा संगीत संयोजन न्हुछे महर्जनले गरेका छन् ।

रेडियो नेपालको स्टुडियोमा रेकोर्डिङ गरिएको यस गीतमा नेपाली मौलिकता र आधुनिकताको सन्तुलन पाइन्छ । त्यसैले पनि सबै श्रोता तथा दर्शकको मन जित्ने विश्वास रहेको गीतकार उप्रेती बताउँछन् । 

एक दशकदेखि गीत संगीतमा क्रियाशील रहेका उप्रेतीको ‘तिम्रो दिलको’, ‘लगन जुरेर’, ‘लाइदेऊ माया’, ‘नजरको गुलेली’, ‘जाले रुमाल’, ‘दिल यहाँ’ जस्ता दर्जन बढी चर्चित गीत यसअघि नै सार्वजनिक भइसकेका छन् ।