प्रसिद्ध गायक एवं सङ्गीतकार दीप श्रेष्ठले आफ्नो जीवनका महत्त्वपूर्ण गीतहरू सङ्गीत पारखीमाझ प्रस्तुत गर्ने भएका छन् । 

बुकहिल पब्लिकेशनले शुरूआत गर्न लागेको साङ्गीतिक कार्यक्रम ‘बुकहिल ब्यालेड्स’को पहिलो शृङ्खलामा श्रेष्ठले आफ्ना गीत फरक शैलीमा प्रस्तुत गर्न लागेका हुन् ।

यही जेठ २९ गते शुक्रबार काठमाडौंको शिल्पी थिएटरमा आयोजना हुने ‘बुकहिल ब्यालेड्स : दीप श्रेष्ठ- म पत्थरको देवता होइन’ कार्यक्रममा गायक एवं सङ्गीतकार श्रेष्ठले २०२५ सालदेखि आजसम्मको आफ्नो साङ्गीतिक जीवनका आरोह-अवरोहका कथाका साथमा स्रोता-दर्शकले मन पराएका र केही नयाँ गीतहरू प्रस्तुत गर्ने बुकहिलले जनाएको छ ।

साहित्यसँगै सङ्गीत र संस्कृतिको अभिवृद्धिमा क्रियाशील बुकहिलले प्रत्येक ३ महिनामा औपचारिक रूपमा ‘बुकहिल ब्यालेड्स’ आयोजना गर्ने जनाएको छ । 

कार्यक्रमबारे बुकहिलका अध्यक्ष भूपेन्द्र खड्का भन्छन्, ‘म आफैं पनि सङ्गीत क्षेत्रकै मान्छे हुँ । सङ्गीतका स्वर र सुर साधकलाई फरक रूपमा स्रोता र दर्शकमाझ प्रस्तुत गर्न बुकहिल ब्यालेड्स आयोजना गर्न लागेका हौं । पहिलो कार्यक्रम नै प्रसिद्ध गायक एवं सङ्गीतकार दीप श्रेष्ठबाट शुरू हुने भएपछि यसको सफलता र निरन्तरतामा ढुक्क छौं ।’

नेपाली सङ्गीतका ‘लिभिङ लिजेन्ड’को रूपमा परिचित श्रेष्ठ ‘म पत्थरको देवता होइन’ बोलको गीत गायन र सङ्गीतबाट नेपाली सङ्गीत क्षेत्रमा प्रवेश गरेका हुन् । श्रेष्ठले करिब ६ दशकको अवधिमा हजारौं गीतमा स्वर तथा सङ्गीत भरेका छन् ।
 
श्रेष्ठका म पत्थरको देवता होइन, हुँ यात्री, कति कमजोर रहेछ भाग्य, भन्थिन् मेरी उनी, झस्किएछ मन मेरो, बितेका कुराले, हर रात सपनीमा, म त दूरदेखि आएँ, झिरमा उनिनु एउटा कुरा लगायतका सयौं गीत कालजयी बनेका छन् ।

‘बुकहिल ब्यालेड्स’मा गीतभित्रका कथासँगै प्रस्तुत हुने गायनमा ७ जना वाद्यवादकले श्रेष्ठलाई साथ दिनेछन् ।

१५८ जना दर्शकका लागि मात्रै टिकटमा आयोजना हुन लागेको यो कार्यक्रमको थुप्रै डटकममार्फत् टिकट बिक्री खुल्ला गरिएको छ ।