कतारको राजधानी दोहामा इजरायली आक्रमणपछि अरब र इस्लामिक देशहरूका विदेशमन्त्रीहरूको बैठक आयोजना भइरहेको छ । सेप्टेम्बर १५ मा हुने आपतकालीन अरब-इस्लामिक शिखर सम्मेलनको तयारीको रूपमा यो बैठक बोलाइएको हो।

मंगलबार इजरायलले दोहाको एक घरमा उपस्थित हमास नेताहरूलाई लक्षित गरेर आक्रमण गरेको थियो । प्यालेस्टिनी संगठन हमासले आक्रमणमा आफ्ना पाँच सदस्य र एक कतारी सुरक्षा अधिकारीको मृत्यु भएको बताएको छ । यसबारे अरब-इस्लामिक देशहरूमा आक्रोश छ।

दोहा समाचारका अनुसार, कतारका प्रधानमन्त्री र अर्थमन्त्री शेख मोहम्मद बिन अब्दुलरहमान अल थानीले आइतबार कतारमा भएको हवाई आक्रमणको लागि इजरायललाई जिम्मेवार ठहराउन अन्तर्राष्ट्रिय समुदायलाई अपील गरेका छन् ।

अरब लिगले दोहा बैठकले अरब-इस्लामिक सहयोगको स्पष्ट सन्देश पठाउनुपर्ने बताएको छ । पाकिस्तानको विदेश मन्त्रालयले आफ्नो विज्ञप्तिमा भनेको छ, 'हामी हाम्रो मित्रवत र सार्वभौम राष्ट्रमाथि इजरायलले गरेको अर्को अवैध आक्रमणको बारेमा छलफल गर्न भेला भएका छौं।'

सेप्टेम्बर १५ मा हुने आपतकालीन शिखर सम्मेलन कतारसँग ऐक्यबद्धता जनाउन आह्वान गरिएको छ।

यस बैठकमा कतारको सार्वभौमसत्ता र अन्तर्राष्ट्रिय कानूनको उल्लङ्घनबारे छलफल गरिनेछ र क्षेत्रीय शान्ति र स्थिरताको लागि साझा रणनीति बनाउने प्रयास गरिनेछ ।