२९ असार २०८३, सोमबार
ललितपुरको नख्खु कारागारबाट भागेका एक कैदीबन्दीले श्रीमतीको हत्या गरेका छन् ।
काभ्रेको पनौती नगरपालिका-१२ गागलस्थित पाखोबारी बस्ने ३३ वर्षीय सन्तबहादुर तामाङले आफ्नी श्रीमती अन्दाजी ३२ वर्षीया जमुना तामाङको हत्या गरेका हुन् ।
गत भदौ २४ गते जेनजी आन्दोलनको बलमा कारागारबाट भागेका उनी सोही दिन बेलुका घर पुगेका थिए । घरायसी विवादमा उनले असोज २ गते राति जमुनाको हत्या गरेको प्रहरीले जनाएको छ ।
जमुनाको शव घरदेखि ५०० मिटर उत्तरतर्फ खाल्डोमा गाडिएको अवस्थामा फेला परेको थियो । इलाका प्रहरी कार्यालय बनेपाको टोलीसहित फरेन्सिक मेडिसिन विभागको विशेषज्ञ डाक्टरको टोलीले उक्त लासको उत्खनन् गरी प्रारम्भिक अनुसन्धान कार्यपश्चात पोष्टमार्टमका लागि धुलिखेलस्थि फरेन्सिक मेडिसिन विभागमा राखेको छ ।
सन्तबहादुरको कुटपिटबाट जमुनाको मृत्यु भएको प्रहरीले जनाएको छ । मृत्यु भएपछि उनले खाल्डो खनेर शव गाडेका फरार भएका थिए ।
उनी असोज ३ गते नख्खु कारागारमा उपस्थित हुन गएको जिल्ला प्रहरी कार्यालय काभ्रेपलाञ्चोकबाट खटिएको प्रहरी अधिकृतको प्रारम्भिक अनुसन्धानबाट खुल्न आएको डीएसपी मीनबहादुर घलेले बताए ।
