सिद्धार्थ बैंकले १०.५३ प्रतिशत लाभांश वितरणको प्रस्ताव गरेको छ ।​

२०८२ असोज २१ गते बसेको बैंक सञ्चालक समितिको ४६१औं बैठकले आर्थिक वर्ष (आव) २०८१/८२ को वितरणयोग्य मुनाफाबाट बैंकका शेयरधनीहरूलाई ५ प्रतिशत बोनस शेयर र ५.५३ प्रतिशत नगद लाभांश (कर प्रयोजनका लागि समेत) गरी कुल १०.५३ प्रतिशतको लाभांश वितरण गर्ने प्रस्ताव गरेको हो ।​

बैंकको हाल कायम रहेको चुक्ता पुँजी १४ अर्ब ८ करोड ९९ लाख ८०  हजार १९० रुपैयाँमा ५ प्रतिशत बराबरको ७० करोड ४४ लाख ९९ हजार १० रुपैयाँ बोनस शेयर तथा ५.५३ प्रतिशत बराबरको ७७ करोड ९१ लाख ७५ हजार ९०५ रुपैयाँ नगद लाभांश प्रस्ताव गरेको हो ।

उक्त लाभांश नेपाल राष्ट्र बैंकबाट स्वीकृत भएपश्चात् तथा बैंकको आगामी साधारणसभाबाट पारित भएपछि वितरण गरिने बैंकले जनाएको छ ।

यस्तै, बैंकले आर्थिक वर्ष २०८१/८२ मा रु ३ अर्ब ३६ करोड खुद नाफा आर्जन गरेको छ । यस मुनाफा अघिल्लो वर्षको मुनाफाको तुलनामा २८ करोड अर्थात् ९.३०५ को वृद्धि हो ।

यसैगरी, बैंकको वितरणयोग्य मुनाफा १ अर्ब ८३ करोड कायम रहेको छ ।

खुद मुनाफाको तुलनामा बैंकको वितरणयोग्य मुनाफामा केही संकुचन आएको देखिएको र त्यसको मुख्य कारण आव २०८१/८२ को खुद मुनाफाबाट १ अर्ब ४६ करोड बराबर रकम ऋणपत्रको लागि पुँजी फिर्ता जगेडा कोषमा विनियोजन गर्नु रहेको बैंकद्वारा जारी विज्ञप्तिमा उल्लेख छ ।