हुलाक सेवा विभागले नेपाली क्रिकेट खेलाडीको तस्वीर अंकित हुलाक टिकट प्रकाशन गरेको छ । 

नेपाली क्रिकेट खेलाडीको तस्वीर अंकित हुलाक टिकटमा सञ्चार तथा सूचना प्रविधिमन्त्री जगदीश खरेल र राष्ट्रिय खेलकुद परिषद् (राखेप)का सदस्यसचिव टंकलाल घिसिङले हुलाक सेवा विभागमा आयोजित एक कार्यक्रमबीच टाँचा लगाए ।

विश्व हुलाक दिवस-२०२५ को अवसरमा आईसीसी पुरुष टी-२० विश्वकप र आईसीसी महिला यू-१९ विश्वकप प्रतियोगितामा सहभागी खेलाडीको तस्वीर अंकित हुलाक टिकटमा टाँचा लगाउनका साथै प्रदर्शनी गरिएको हो ।

खेलकुदको माध्यमबाट अन्तर्राष्ट्रिय कूटनीतिक सम्बन्ध विस्तारमा महत्त्वपूर्ण भूमिका निर्वाह गरेको नेपाली क्रिकेट खेलाडीको सम्मानका लागि हुलाक टिकट प्रकाशन गरिएको हुलाक सेवा विभागले जनाएको छ । विभागले २०८१ चैत १७ गतेको निर्णय अनुसार १० रूपैयाँ दरको पाँच लाख प्रति हुलाक टिकट प्रकाशन गरेको हो ।

नेपालले सन् २०२४ मा अमेरिका र वेष्ट इन्डिजमा आयोजना भएको आईसीसी टी–२० विश्वकप खेलेको थियो । त्यसअघि सन् २०१४ मा नेपाली टोलीले पहिलो पटक टी-२० विश्वकपमा सहभागिता जनाएको थियो । उमेर समूहको नेपाली राष्ट्रिय महिला टोलीले यू-१९ विश्वकप क्रिकेटमा सहभागिता जनाएको थियो ।