११ साउन २०८३, सोमबार
ओमानमा जारी आईसीसी टी–२० विश्वकप छनोट अन्तर्गत समूह चरणको अन्तिम खेलमा नेपालले पहिले फिल्डिङ गर्ने भएको छ ।
नेपालले टस जितेर जापानलाई पहिले ब्याटिङ गर्न निम्तो दिएको हो । खेल नेपाली समय अनुसार अपरान्ह सवा ४ बजे शुरू हुनेछ ।
नेपाल र जापान यसअघि नै समूह ‘बी’ बाट ‘सुपर–६’ चरणमा पुगिसकेका छन् ।
शुक्रबारको खेल यी दुबै टोलीका लागि निकै महत्वपूर्ण छ । यो खेलमा विजयी हुने टोली आफ्नो समूहको विजेता बन्दै ‘सुपर–६’ चरणमा पुग्नेछ । पराजित हुने टोली उप–विजेताका रुपमा अगाडि जानेछ ।
यसका अतिरिक्त, शुक्रबारको खेलमा जित निकाल्दै समूह विजेता बन्ने टोलीले ‘सुपर–६’ चरणमा प्रवेश गर्दा दुई अंक पनि सँगै लैजाने छ । सम्बन्धित टोलीका लागि यो दुई अंक ‘सुपर–६’ चरणमा निकै महत्वपूर्ण सावित हुनेछ ।
समूहगत चरणको पहिलो खेलमा नेपालले कुवेतलाई ५८ रनले हराएको थियो । जापानले पनि आफ्नो पहिलो खेलमा कुवेतलाई नै पाँच विकेटले पराजित गरेको थियो । लगातार दुई हारपछि कुवेत भने छनोटको होडबाट बाहिरिसकेको छ ।
एसिया–प्रशान्त क्षेत्रको अन्तिम चरणको छनोट प्रतियोगितामा नौ टोली सहभागी छन् । प्रारम्भिक चरणमा नौवटा टोलीलाई तीन समूहमा विभाजन गरिएको छ । प्रत्येक समूहबाट पहिलो र दोस्रो हुने टोली ‘सुपर–६’ चरणमा पुग्ने प्रावधान छ ।
‘सुपर–६’ चरणको खेलको समाप्तिपछि अंक तालिकाको पहिलो, दोस्रो र तेस्रो स्थानमा आउने टोली आगामी टी–२० विश्वकपमा छनोट हुनेछन् ।
