०५ साउन २०८३, मंगलबार
आईसीसी टी–२० विश्वकप छनोट प्रतियोगिताको ‘सुपर–६’ चरणको आफ्नो अन्तिम खेलमा सामोआविरुद्ध नेपाली टोलीका ओपनर ब्याट्सम्यान आसिफ शेखले अर्धशतक बनाएका छन् ।
२४ वर्षीय आसिफले टी–२० अन्तर्राष्ट्रिय क्रिकेटमा बनाएको यो १०औं अर्धशतक हो । उनले टी–२० अन्तर्राष्ट्रिय क्रिकेटमा एक हजार ६ सय रन पनि पूरा गरेका छन् ।
आसिफ केवल ३४ बलमा चार छक्का र ६ चौकाको मद्दतले ६९ रन बनाएर आउट भए । नेपालका लागि दुवै ओपनरले ६३ रनको साझेदारी गरे ।
अर्का ओपनर कुशल भुर्तेलले १७ रन बनाए । उनले १५ बलमा एक छक्का र दुई चौका प्रहार गरे । उनी सातौं ओभरको चौथो बलमा आउट भएका थिए ।
तेस्रो नम्बरमा क्रिज समाल्न आएको दीपेन्द्रसिंह ऐरी आठ रन बनाउँदै क्रिजमा छन् ।
यो खेलमा विजयी भए नेपाली टोली छनोट प्रतियोगिताको उपाधिसहित स्वदेश फर्कने छ । नेपालले यसअघि दुईपटक टी–२० विश्वकप खेले पनि छनोट प्रतियोगिताको उपाधि भने जित्न सकेको छैन ।
एसिया–प्रशान्त क्षेत्रको जारी छनोट प्रतियोगिताबाट नेपाल, ओमान र यूएईले यसअघि नै सन् २०२६ मा आयोजना हुने टी–२० विश्वकपमा स्थान पक्का गरिसकेका छन् ।
