१२ साउन २०८३, मंगलबार
ओमानमा जारी आईसीसी टी–२० विश्वकप छनोट प्रतियोगिताको ‘सुपर–६’ चरणको आफ्नो अन्तिम खेलमा नेपालले सामोआलाई जीतका लागि दुई सय १२ रनको विशाल लक्ष्य दिएको छ ।
टस हारेर पहिले ब्याटिङको निम्तो पाएको नेपालले निर्धारित २० ओभरमा चार विकेट गुमाएर दुई सय ११ रन बनाएको हो । जारी छनोट प्रतियोगितामा कुनै पनि टोलीले बनाएको यो दोस्रो ठूलो स्कोर हो ।
ओपनर ब्याट्सम्यान असिफ शेख र कुशल भुर्तेलले नेपाललाई गतिलो शुरूआत दिए । उनीहरूले ६३ रनको साझेदारी गरे । आसिफ शेखले उत्कृष्ट अर्धशतक बनाए । २४ वर्षीय आसिफले टी–२० अन्तर्राष्ट्रिय क्रिकेटमा बनाएको यो १०औं अर्धशतक हो ।
उनले टी–२० अन्तर्राष्ट्रिय क्रिकेटमा एक हजार ६ सय रन पनि पूरा गरे । आसिफले टोलीका लागि ६९ रनको योगदान गरे । यस क्रममा उनले ४१ बलको सामना गरी चार छक्का र सात चौका हिर्काए ।
१३औं ओभरको पाँचौं बलमा आसिफ आउट हुँदा नेपालले एक सय १० रन बनाइसकेको थियो । अर्का ओपनर कुशल भुर्तेलले १७ रन बनाए ।
कुशलले १५ बलमा एक छक्का र दुई चौका प्रहार गरे । उनी सातौं ओभरको चौथो बलमा आउट भएका थिए । कुशलले अघिल्लो खेलमा अर्धशतक बनाएका थिए ।
तेस्रो नम्बरमा क्रिज समाल्न आएको दीपेन्द्रसिंह ऐरी पनि टोलीका लागि उत्कृष्ट अर्धशतकीय योगदान गरे । उपकप्तानको भूमिकामा रहेका दीपेन्द्रले ५३ रन बनाए ।
यस क्रममा दीपेन्द्रले केवल ३३ बलको सामना गरी चार छक्का र दुई चौका पनि प्रहार गरे । १७औं ओभरको पाँचौं बलमा दीपेन्द्र आउट हुँदा नेपालले एक सय ६० रन बनाइसकेको थियो ।
चौथो नम्बरका ब्याट्सम्यान आरिफ शेख नौ रन बनाउँदै पेभेलियन फर्किए । १४औं ओभरको अन्तिम बलमा तेस्रो विकेटका रूपमा आरिफ शेख पेभेलियन फर्कँदा नेपालले एक सय २० रन बनाएको थियो ।
पाँचौं नम्बरमा ब्याटिङ गर्न आएका कप्तान रोहित पौडेलले अविजित २१ रन बनाए । उनले केवल १२ बलमा एक छक्का र एक चौका पनि प्रहार गरे ।
दीपेन्द्र पेभेलियन फर्किएपछि उनको स्थान लिन आएका लोकेश बमले पनि आक्रामक पाली खेल्दै अविजित ३९ रनको योगदान गरे । उनले केवल १२ बलमा चार छक्का र दुई चौका हिर्काए ।
यो खेलमा विजयी भए नेपाली टोली छनोट प्रतियोगिताको उपाधिसहित स्वदेश फर्कने छ । नेपालले यसअघि दुईपटक टी–२० विश्वकप खेले पनि छनोट प्रतियोगिताको उपाधि भने जित्न सकेको छैन ।
एसिया–प्रशान्त क्षेत्रको जारी छनोट प्रतियोगिताबाट नेपाल, ओमान र संयुक्त अरब इमिरेट्स (यूएई)ले यसअघि नै सन् २०२६ मा आयोजना हुने टी–२० विश्वकपमा स्थान पक्का गरिसकेका छन् ।
‘सुपर–६’ तालिकामा नेपाल र ओमानको समान आठ–आठ अंक छ । नेट रन रेटमा ओमानभन्दा नेपाल अगाडि छ । नेपालको नेट रन रेट ०.७४५ र ओमानको नेट रन रेट ०.४५६ रहेको छ ।
यूएई ६ अंकसहित तालिकाको तेस्रो स्थानमा आसीन छ ।
कतार, जापान र सामोआको विश्वकपमा छनोट हुने सपना भने समाप्त भएको छ ।
