०९ साउन २०८३, शनिबार
नामिबियाको राष्ट्रिय टोलीका कप्तान जेरहार्ड इरास्मसले नेपाल प्रिमियर लिग (एनपीएल) क्रिकेटको दोस्रो संस्करण पनि काठमान्डु गोर्खाजबाटै खेल्ने भएका छन् ।
काठमाडौं स्पोर्टस डेभलपमेन्ट भेन्चर्स प्रालिको स्वामित्वमा रहेको काठमान्डु गोर्खाजले आगामी संस्करणका लागि आफ्नो दोस्रो विदेशी खेलाडीका रूपमा इरास्मसलाई भित्र्याएको हो ।
३० वर्षीय इरास्मसले सन् २०१९ देखि निरन्तर नामिबियाको नेतृत्व गर्दै आएका छन् । उनले सन् २०२३ र सन् २०२४ मा आईसीसी पुरुष एसोसिएट क्रिकेटर अफ द इयर पुरस्कार जितेका थिए ।
सन् २०२४ को पुरुष एसोसिएट क्रिकेटर अफ द इयर बन्ने क्रममा उनले कीर्तिपुर मैदानमा नेपालविरुद्ध विश्व क्रिकेट लिग–२ का खेलमा २८ रन खर्चेर पाँच विकेट लिएका थिए ।
त्यो उनको एकदिवसीय अन्तर्राष्ट्रिय खेलजीवनकै उत्कृष्ट बलिङ प्रदर्शन पनि हो । उनले त्यो वर्ष चार अर्धशतक पनि प्रहार गरेका थिए । उनले सन् २०२४ मा ट्वान्टी–२० अन्तर्राष्ट्रियमा १८ विकेट लिएका थिए ।
काठमान्डु गोर्खाजको टोलीसँग उनी यसअघि नै परिचित छन् । एनपीएलको पहिलो संस्करणमा उनले काठमान्डु गोर्खाजको उप–कप्तानको भूमिका निर्वाह गरेका थिए ।
एनपीएलको पहिलो संस्करणमा उनले सात खेलमा १३७ भन्दा माथिको स्ट्राइक रेटमा कूल एक सय १० रन बनाएका थिए । उनले ११.९० को औसतमा ११ विकेट पनि लिएका थिए ।
‘गत सिजन इरास्मसले काठमान्डु गोर्खाजबाट उत्कृष्ट प्रदर्शन गरेका थिए । यो वर्ष उनले अझ राम्रो खेल्ने विश्वास लिएका छौं । इरास्मस राम्रो लिडर पनि हुन्,’ काठमान्डु गोर्खाजद्वारा जारी विज्ञप्तिमा भनिएको छ ।
इरास्मस एसोसिएट क्रिकेटको उत्कृष्ट अलराउन्डर र उत्कृष्ट फिल्डर पनि हुन् । ‘उनीजस्ता खेलाडीलाई राखेर टिम बनाउँदा नतिजामुखी हुने अपेक्षा राखेको छु’, काठमान्डु गोर्खाजका प्रशिक्षक वसन्त शाहीले भनेका छन् ।
३० वर्षीय इरास्मसले नामिबियाका लागि एकदिवसीय अन्तर्राष्ट्रियमा ६३ खेल खेल्दै ३८.२१ को औसतमा दुई शतक र १७ अर्धशतकको मद्दतले कूल दुई हजार एक सय ७८ रन बनाएका छन् ।
उनले ७७ टी–२० अन्तर्राष्ट्रियमा एक शतक र १३ अर्धशतकको मद्दतले १२४ भन्दा माथिको स्ट्राइक रेटमा कूल एक हजार आठ सय ३३ रन बनाएका छन् ।
काठमान्डु गोर्खाजले आगामी सिजनको एनपीएलका लागि भित्र्याएको उनी दोस्रो विदेशी खेलाडी पनि हुन् ।
यसअघि नै काठमान्डुले दक्षिण अफ्रिकामा जन्मिएका र हाल इङ्ल्यान्डको घरेलु क्रिकेटमा खेल्दै आएका रिकार्डो भास्कोनेसेलोसलाई टोलीमा आबद्ध गरिसकेको छ ।
