अमेरिकाको लोकप्रिय पत्रिका पीपल म्यागजिनले वर्ष २०२५ का लागि विश्वकै‘आकर्षक पुरुष’ घोषणा गरेको छ । यो वर्ष उक्त उपाधि ब्रिटिस अभिनेता जोनाथन बेलीले प्राप्त गरेका छन् । बेली सार्वजनिक रूपमा आफू समलिङ्गी भएको स्वीकृति दिएका अभिनेता हुन् ।

म्यागजिनले बेलीको तस्बिर र  कुकुर बेन्सनसहितको अर्को विशेष आवरण पनि प्रकाशित गरेको छ ।

पीपल म्यागजिनले हरेक वर्षजस्तै यसपटक पनि चर्चित अभिनेता मध्येबाटै यो उपाधि चयन गरेको हो । 

गत वर्ष यो उपाधि अभिनेता जोन क्रासिन्स्कीले पाएका थिए । पत्रिकाका अनुसार उपाधि पाउनका लागि केवल आकर्षक रूप नै पर्याप्त हुँदैन, व्यक्तित्व, सामाजिक संलग्नता र सकारात्मक प्रभाव पनि विचार गरिन्छ ।

‘आकर्षक पुरुष’ उपाधिको आर्थिक मूल्य भने अहिलेसम्म अज्ञात छ । पत्रिकाले न त विजेतालाई तलब दिन्छ न विजेताबाट शुल्क लिन्छ।

पीपल म्यागजिनले यसपटकका अन्य विशेष उपाधिहरू पनि घोषणा गरेको छ । खेल क्षेत्रमा ‘Sexiest New Dad in Sports’ का रूपमा क्रिस्टियन म्याक्काफ्री र ‘Sexiest Cat Dad’ का रूपमा अभिनेता डेभ फ्रान्को चयन भएका छन् ।

यो परम्परागत उपाधिलाई हलिउडको एक रोचक, मनोरञ्जक र कहिलेकाहीँ “शापित” मानिएको परम्पराको निरन्तरता मानिन्छ ।