०९ साउन २०८३, शनिबार
१० औं राष्ट्रिय खेलकुद प्रतियोगिता आउँदो फागुन पहिलो साता आयोजना गर्नेगरि नयाँ मिति तय भएको छ ।
युवा तथा खेलकुदमन्त्री बब्लु गुप्ताको अध्यक्षतामा बुधबार बसेको राष्ट्रिय खेलकुद परिषद् (राखेप)को १२३ औं बोर्ड बैठकले यो निर्णय गरेको हो ।
युवा तथा खेलकुदमन्त्री राखेपको अध्यक्ष पनि हुन् । राखेप बोर्डको निर्णय अनुसार, राष्ट्रिय खेलकुद प्रतियोगिताको १० औं संस्करण कर्णाली प्रदेशमा फागुन १ देखि ७ गतेसम्म आयोजना हुनेछ ।
बैठकले नेपाललाई पहिलो अन्तर्राष्ट्रिय पदक दिलाउने पूर्वधावक जितबहादुर केसीलाई २५ लाख रूपैयाँ नगद पुरस्कार दिन मन्त्रिपरिषद्मा सिफारिस गर्ने निर्णय पनि गरेको छ ।
यसैगरी, बैठकले लामो समयदेखि राष्ट्रिय प्रतियोगिता आयोजना नगर्ने राष्ट्रिय खेल संघलाई तीन महिनाभित्र राष्ट्रिय प्रतियोगिता गर्न निर्देशन दिने, राष्ट्रिय खेल संघ आफैंले घोषणा गरेको खेलाडीको सुविधा र पुरस्कार १५ दिनभित्र सम्बन्धित खेलाडीलाई उपलब्ध गराउन निर्देशन दिने, खेल संघले वैदेशिक भ्रमण सम्बन्धी प्रतिवेदन राखेपमा पेस गर्न निर्देशन दिनेलगायतको निर्णय पनि गरेको छ ।
राखेपका सदस्यसचिव टंकलाल घिसिङले सहजीकरण गरेको उक्त बैठकमा राखेपका उपाध्यक्ष ध्रुव आचार्य, खेलकुद मन्त्रालयका सचिव डा. हरिप्रसाद लम्साल, बोर्ड सदस्यलगायतको उपस्थिति रहेको थियो ।
