०२ साउन २०८३, शनिबार
काठमाडौं स्पाइकर्सले वात्सल्य एभरेष्ट महिला भलिबल लिगको फाइनलमा पुग्ने सम्भावना जिवितै राखेको छ । काठमाडौं स्पाइकर्सले बिहीबार खेलिएको प्रतिस्पर्धात्मक खेलमा पोखरा निन्जाजलाई ३–१ सेटले हरायो ।
त्रिपुरेश्वरस्थित राष्ट्रिय खेलकुद परिषद्को कभर्डहलमा खेलिएको उक्त खेलमा काठमाडौं स्पाइकर्सले शुरूको दुई सेटमा लगातार सफलता हात पारेको थियो । त्यसपछि तेस्रो सेटमा पोखरा निन्जाजले खेलमा उत्कृष्ट पुनरागमन गरेको थियो ।
काठमाडौं स्पाकइकर्सले पहिलो सेटको नतिजालाई २५–१९ अंकले आफ्नो पक्षमा पारेको थियो । काठमाडौं स्पाइकर्सले दोस्रो सेटको नतिजालाई पनि २५–१७ अंकले आफ्नो पक्षमा पारेको थियो । तेस्रो सेटमा भने काठमाडौं स्पाइकर्सले लय गुमाएको थियो ।
तेस्रो सेटमा पोखरा निन्जाज २५–१२ अंकले अगाडि रह्यो । पोखरा निन्जाजका लागि मीना सुनार र कप्तान प्रगति नाथले उत्कृष्ट प्रदर्शन गरे । चौथो सेट पनि निकै प्रतिस्पर्धात्मक रह्यो ।
तर, काठमाडौं स्पाइकर्सले चौथो सेटको नतिजालाई पनि २५–१८ अंकले आफ्नो पक्षमा पार्यो । यो जितपछि काठमाडौं स्पाइकर्सको फाइनलमा पुग्ने सम्भावना जिवितै छ । पोखरा निन्जाज भने यसअघि नै उपाधि होडबाट बाहिरिइसकेको छ ।
अब ललितपुर क्विन्स र काठमाडौं स्पाइकर्समध्ये एक टोली फाइनलमा पुग्नेछन् । काठमाडौं स्पाइकर्सले आफ्नो अन्तिम खेल शुक्रबार लुम्बिनी लाभाजसँग खेल्नेछ ।
बिहीबारको दोस्रो खेल लुम्बिनी लाभाज र मधेश युनाइटेडबीच खेलिने छ । यो खेल साँझ १७:०० बजे शुरू हुनेछ । यी दुवै टोली उपाधि होडबाट बाहिरिइसकेका छन् ।
एभरेष्ट महिला भलिबल लिगको यो दोस्रो संस्करण हो । यसअघि दोस्रो संस्करणका खेलहरू पोखरामा खेलाइएको थियो । तर, जेन–जीको प्रदर्शनपछि विकसित असहज परिस्थितिका कारण खेल बीचमै स्थगित भएको थियो । प्रतियोगिताको आयोजक इन्फिनिटी ड्रिम्स हो ।
