गोल्डम्यान स्याक्सले अक्टोबर २०२४ मा गरेको ‘न्यूट्रल’ रेटिङलाई उल्टाउँदै भारतलाई फेरि ‘ओभरवेट’ मा उकासेको छ। कम्पनीका अनुसार भारतमा आय वृद्धि बलियो बन्दै गएको छ र नीतिगत समर्थनले आर्थिक विस्तारलाई थप टेवा दिएको छ।

विश्वव्यापी ब्रोकरेज फर्मले निफ्टी ५० सूचकांकका लागि २०२६ अन्त्यसम्म २९,००० को लक्ष्य राखेको छ, जसले गत शुक्रबारको बजार बन्द भएको मूल्यबाट करिब १४ प्रतिशत वृद्धि सम्भावना देखाउँछ।

तर, सुनिल कौल नेतृत्वको विश्लेषक समूहका अनुसार पूरै वर्षजति चलेको आय घट्ने चक्र अब तलसम्म पुगेको छ र पुनः उकासिने बाटो खुल्न थालेको छ।

गोल्डम्यानले आर्थिक विस्तारलाई सहयोग पुर्‍याउने नीतिहरूलाई मुख्य कारणका रूपमा उल्लेख गरेको छ।

रिजर्भ बैंक अफ इन्डियाद्वारा गरिएका ब्याजदर कटौती, तरलता सहजता, बैंक नियमनमा गरिएको खुकुलोपन, जीएसटीमा कमी र सरकारी खर्च संकुचनको ढिलो गति जस्ता कदमले बजारमा सकारात्मक वातावरण बनाएको उसको मूल्यांकन छ। यो टिप्पणी भारतको बजार बन्द भएपछि शुक्रबार सार्वजनिक गरिएको हो।

ब्रोकरेजका अनुसार सेप्टेम्बर त्रैमासिक नतिजाहरू अपेक्षाभन्दा राम्रो आएकाले केही क्षेत्रमा आय अनुमान समेत बढाइएको छ।

उनीहरूको आकलनमा वित्तीय क्षेत्र, उपभोक्ता वस्तु, दिगो सामग्री, अटो, रक्षा, आयल मार्केटिङ कम्पनी र इन्टरनेट तथा टेलिकम कम्पनीहरूले पुनरुत्थानको नेतृत्व गर्न सक्छन्। तर, निर्यातमुखी सूचना प्रविधि (आईटी), औषधि, उद्योग र रसायन क्षेत्रबारे भने उनीहरू सतर्क छन्, किनकि यी क्षेत्रमा आय दबाब र सार्वजनिक पुँजीगत खर्चको घट्दो गतिले चुनौती छ।

निफ्टी २०२४ को उच्च बिन्दुदेखि हालसम्म विदेशी लगानीकर्ताले झण्डै ३० अर्ब डलरको हिस्सा बेचिसकेका छन् र २०२५ मा मात्र १७.४ अर्ब डलर निकालेका छन्। तर, घरेलु संस्थागत लगानीकर्ताबाट रिटेल र एसआईपीमार्फत आएको स्थिर प्रवाह तथा करिब ७० अर्ब डलरको इक्विटी खरिदले बजारमा फेरि मोड आउने संकेत मिलेको गोल्डम्यानको मूल्यांकन छ।

उदीयमान बजारहरूको तुलनामा भारतको मूल्यांकन प्रिमियम सेप्टेम्बर २०२४ को स्तरभन्दा निकै कम भएपछि यो अब रक्षात्मक रहेको कम्पनीको भनाइ छ, यद्यपि भारत अझै पनि आफ्ना समकक्षहरूमध्ये महंगो बजार हो।

बढ्दो भू-राजनीतिक र व्यापारिक जोखिमबीच गोल्डम्यानले आन्तरिक आत्मनिर्भरता, जनसाधारणको उपभोगमा पुनरुत्थान, नयाँ अर्थतन्त्रका क्षेत्रहरू तथा मध्यम मूल्यांकनमा उच्च वृद्धि सम्भावना भएका उद्योगहरूलाई आगामी प्रतिफलको मुख्य आधार बताएको छ।

गोल्डम्यान स्याक्सको भारतबारे सकारात्मक मूल्यांकन एचएसबिसीले सेप्टेम्बर अन्त्यतिर गरेको समान कदमपछि आएको हो।