१० साउन २०८३, आइतबार
भ्रमणकारी टोली दक्षिण अफ्रिकाले भारत विरुद्धको टेस्ट शृंखलामा ‘क्लिनस्विप’ गरेको छ । गुवाहाटीमा खेलिएको दोस्रो टेस्टमा पनि दक्षिण अफ्रिकाले भारतलाई चार सय आठ रनको विशाल अन्तरले पराजित गर्यो ।
दोस्रो टेस्टको पाँचौँ तथा अन्तिम दिन बुधबार घरेलु टोली भारत आफ्नो दोस्रो पालीमा केवल एक सय ४० रन बनाउँदै अलआउट हुन पुग्यो । भारतीय टोली पाँच सय ४९ रनको विशाल लक्ष्य पछ्याउँदै जवाफी ब्याटिङमा ओर्लिएको थियो ।
आईसीसी विश्व टेस्ट च्याम्पियनसिपअन्तर्गत खेलिएको दुई खेलको शृंखला दक्षिण अफ्रिकाले २–० ले जितेको हो । यसअघि इडन गार्डेन्समा खेलिएको पहिलो टेस्टमा पनि दक्षिण अफ्रिकाले भारतलाई ३० रनले हराएको थियो ।
दोस्रो टेस्टको दोस्रो पालीमा पनि भारतीय ब्याट्सम्यान दक्षिण अफ्रिकी बलरसामू निरीह बने । भारतीय ब्याट्सम्यानहरू एकपछि अर्को गर्दै पेभेलियन फर्कनेक्रम जारी रह्यो । चौथो दिन नै दुई विकेट गुमाइसकेको भारतले अन्तिम दिन थप आठ विकेट गुमायो ।
टोलीको कूल स्कोर ५० रन पुग्नुअघि नै भारतले चार विकेट गुमाएको थियो । दोस्रो पालीमा रविन्द्र जडेजाले सर्वाधिक ५४ रन बनाए । साई सुदर्शनले एक सय ३९ बलमा केवल १४ रन जोडे । केएल राहुल ६ रन बनाउँदै आउट भए ।
अर्का ओपनर यशस्वी जैसवाल पनि १३ रनमै पेभेलियन फर्किए । कुलदीप यादव पाँच रनभन्दा अगाडि बढ्न सकेनन् । ध्रुव जुरेल दुई रनमा आउट भए । कप्तान ऋषभ पन्त पनि १३ रनभन्दा अगाडि बढ्न सकेनन् ।
दक्षिण अफ्रिकाका बलर सिमोन हार्मर एक्लैले ६ विकेट लिए । उनले २३ ओभरमा ६ मेडन राख्दै केवल ३७ रन खर्चिए । केशव महाराजले पनि दुई विकेट हात पारे । त्यसअघि, दक्षिण अफ्रिकाले पाँच विकेटको नोक्सानीमा दुई सय ६० रन बनाउँदै दोस्रो पाली समाप्तिको घोषणा गरेको थियो ।
भारतले भने पहिलो पालीमा दुई सय एक रनमात्र बनाएको थियो । टस जितेर पहिले ब्याटिङको निर्णय लिएको दक्षिण अफ्रिकाले पहिलो पालीमा चार सय ८९ रनको विशाल योगफल तयार पारेको थियो । सोही स्कोर नै दक्षिण अफ्रिकाको फराकिलो जितको आधार बन्यो ।
जितसँगै दक्षिण अफ्रिकी टोलीका कप्तान टेम्बा बाभुमाले कप्तानको भूमिकामा एक टेस्ट पनि नहार्ने कीर्तिमानलाई कायमै राखे । घरेलु मैदानमा खेलिएको टेस्ट क्रिकेटमा रनका आधारमा भारतको यो नै सबैभन्दा ठूलो अन्तरको हार पनि हो ।
