छनोट प्रतियोगिताको आयरल्यान्डविरुद्धको खेलमा रातो कार्ड पाएपछि पोर्चुगलका स्टार खेलाडी क्रिस्टियानो रोनाल्डोले विश्वकपको शुरूआती खेल गुमाउने अनुमान गरिएको थियो ।

तर, विश्व फुटबल महासंघ (फिफा)ले आफ्नो नियममा परिवर्तन गरेपछि रोनाल्डोले विश्वकपको शुरूआती खेल गुमाउनु नपर्ने भएको छ ।

फिफाले आयरल्यान्डविरुद्धको खेलमा गरेको गल्तीका लागि रोनाल्डोमाथि तीन खेलको प्रतिबन्ध लगाउने निर्णय त गरेको छ तर, सजायको अवधिमा भने केही लचकता देखाएको छ ।

रोनाल्डोले एक खेल तत्कालै गुमाउने छन् भने बाँकी दुई खेलको प्रतिबन्ध उनले एक वर्षको अवधिमा भोग्नु पर्नेछ ।

यसका अर्थ, पोर्चुगलका कप्तान रोनाल्डोले दुई खेलको प्रतिबन्ध एक वर्षको अवधिमा कुनै पनि समय पूरा गर्न पाउने छन् ।

केही फुटबल विश्लेषकले फिफाको यो निर्णयको विरोध पनि गरेका छन् । उनीहरूले रोनाल्डोलाई फिफाले विशेष सुविधा दिएको आरोप लगाएका छन् ।

हालै आर्मेनिया र बुरुन्डीका खेलाडीमाथि पनि तीन खेलको प्रतिबन्ध लगाइएको थियो । तर, यी दुवै खेलाडीलाई रोनाल्डोको जस्तो सुविधा उपलब्ध गराइएको थिएन ।

त्यसैले फुटबल विशेषज्ञले रोनाल्डोलाई दिइएको सुविधाका लागि फिफामाथि प्रश्न उठाएका हुन् । फिफाको पछिल्लो निर्णय अनुसार, यदि रोनाल्डो एक वर्षभित्र यस्तै गम्भीर गल्ती गरेमा उनले दुई खेलको प्रतिबन्ध तत्कालै भोग्नु पर्नेछ ।

रोनाल्डोले हालै ह्वाइट हासमा अमेरिकी राष्ट्रपति डोनाल्ड ट्रम्पसँग भेट गरेका थिए । त्यतिबेला फिफाका अध्यक्ष जियानी इन्फान्टिनो पनि उपस्थित थिए । ह्वाइट हाउसमा इन्फान्टिनोले रोनाल्डोसँग सेल्फी पनि लिएका थिए । त्यो उपस्थितिलाई पनि फिफाको पछिल्लो निर्णयसँग जोडेर हेरिएको छ ।

पोर्चुगलले आगामी मार्चमा दुईवटा मैत्रीपूर्ण खेल खेल्ने कार्यक्रम रहेको छ । त्यसपछि मे–जुनमा पोर्चुगलले विश्वकपको अभ्यास खेल खेल्ने कार्यक्रम छ । रोनाल्डोले छैटौं पटक विश्वकप खेल्न लागेका हुन् ।