२८ जेठ २०८३, बिहीबार
नेपाली कांग्रेसका सभापति शेरबहादुर देउवानिकट मानिएका तर, विशेष महाधिवेशनको पक्षमा हस्ताक्षर गरेकाहरूलाई फिर्ता ल्याउन संस्थापन पक्षले पहल गर्ने भएको छ ।
वैशाखमा नियमित महाधिवेशन गर्नुपर्ने अडानमा रहेको संस्थापन पक्षको शुक्रबार आनन्दभूमि इभेन्ट्समा बसेको बैठकले यस्तो नीति अख्तियार गर्ने निर्णय गरेको हो ।
शुक्रबार बिहान बसेको उक्त बैठकमा संस्थापन पक्षका करिब ७० जना केन्द्रीय नेताको उपस्थिति रहेको थियो । उक्त बैठकले महामन्त्रीद्वय गगन थापा र विश्वप्रकाश शर्माको पछि लागेका नेताहरूलाई फिर्ता ल्याउने निर्णय गरेको हो ।
‘शेरबहादुरको क्याम्प छाडेर २५-३० जना केन्द्रीय सदस्यहरू उता लागेका छन् । उनीहरूलाई टीममा ल्याएर एकताबद्ध गर्ने भन्ने भयो,’ बैठकमा सहभागी एक नेताले लोकान्तरसँग भने ।
साथै, बैठकमा कुनै पनि हालतमा महाधिवेशन वैशाखमा हुने र पुसमा विशेष महाधिवेशन गर्न नसकिने विषयमा छलफल भएको ती नेताले बताए । बैठकमा बोल्दै नेता विमलेन्द्र निधिले वैशाखअघि कुनै पनि हालतमा महाधिवेशन हुन नसक्ने बताएका थिए ।
उनले पुसमा विशेष महाधिवेशन गर्न नसकिने भन्दै समूहको एजेन्डामा बलियो भएर उभिन सबैलाई अनुरोध गरे ।
‘पुसमा विशेष हुँदैन, नियमित महाधिवेशन वैशाखमा हुन्छ भनेर निधि दाइले भन्नुभयो,’ सहभागी एक नेताले भने ।
गच्छदारले भने- म तपाईंहरूसँगै छु,शंका गर्नुपर्दैन
बैठकमा लामो बोलेका नेता विजयकुमार गच्छदारले आफूले संस्थापन क्याम्प नछाडेको बताएका थिए । आफू विगतदेखि नै यही समूहमा रहेको भन्दै उनले विशेषतिर लाग्यो वा लाग्छ भन्ने कुरा नसोच्न अनुरोध गरे ।
‘मलाई शंका गर्नुपर्दैन,’ गच्छदारको भनाई उद्धृत गर्दै अर्का नेताले भने, ‘म तपाईंहरूकै एजेन्डामा छु र यसैमा रहिरहन्छु ।’
यस्तै, बैठकमा कार्यवाहक सभापति पूर्णबहादुर खड्कालाई पनि विशेष महाधिवेशनको पक्षमा लाग्छ भनेर शंका नगर्न अनुरोध गरिएको थियो ।
‘कार्यवाहक सभापतिलाई शंका नगरौं । उहाँ हाम्रै समूहको नेता हो, उहाँलाई विश्वास गरौं भनेर निर्देशन जस्तै आयो,’ बैठकमा सहभागी ती नेताले भने ।
खड्काले पार्टी विभाजनमा पुग्ने गरी कुनै एजेन्डा नल्याउने बताउँदै आएका छन् । सहमतिमा कार्यतालिका र महाधिवेशन गराउन नसके कार्यवाहक पदबाट राजीनामा दिने खड्काले निकटस्थहरूसँग बताउने गरेका छन् । सोही कारण समूहमा उनको विषयलाई लिएर प्रश्न उठ्न थालेको छ ।
कार्यवाहक सभापतिले छाडेर हिँडे झन् समस्यामा पर्ने भन्दै नेताहरू बालकृष्ण खाँणलगायतले निरन्तर ढाडस दिने काम गरिरहेको स्रोत बताउँछ । खड्कालाई यो समूहले विशेष महाधिवेशनको कार्यतालिका ल्याउन दिन नहुने भन्दै दबाब दिँदै आएको छ ।
सबैतिरको दबाबका कारण खड्का छाडेर हिँड्ने मनसायमा पुगेका हुन् । त्यसैले खड्कालाई ढाडस दिन पनि आजको बैठकमा सबैले उनलाई सहयोग गर्नुपर्ने र विश्वास गर्नुपर्ने विषय उठेको ती नेताले बताए ।
खाँणको निर्देशन मिडियामा गएर पार्टी फुट्छ नभन्नू
छलफलमा बोलेका नेता बालकृष्ण खाँणले पार्टी जटिल अवस्थामा रहेको भन्दै विभाजनको पक्षमा कोही उभिन नहुने बताएका थिए । उनले पार्टी नफुट्ने र फुट्न नदिने दाबी समेत गरे ।
आफ्नो समूहबाट सार्वजनिक कार्यक्रम र मिडियामा गएर बोल्दा पनि संयमता अपनाउन खाँणको अनुरोध थियो । ‘साथीहरू पार्टी फुट्दैन र फुट्न पनि दिनुहुँदैन । सार्वजनिक वक्तव्य र मिडियामा दिने अभिव्यक्तिमा पनि फुटको आसय आउने गरी सो पक्षमा अभिव्यक्ति नदिनुहोला,’ खाँणले बैठकमा भनेको कुरा उद्धृत गर्दै एक नेताले भने ।
यसबाहेक समूहको छलफलमा निर्वाचनअघि क्रियाशील सदस्यताको विषय टुंगो लगाउने र महाधिवेशनमा जाने विगतकै एजेन्डालाई निरन्तरता दिने निष्कर्ष निकालिएको छ ।
यस्तै, मंसिरको १० गते जिल्ला सभापतिदेखि तलको सम्पूर्णको म्याद सकिएकाले अबको केन्द्रीय समिति बैठकले म्याद थपको पक्षमा उभिने निर्णय गरेको छ ।
बैठकबारे जानकारी दिँदै नेता गुरु बरालले आफूहरू विगतकै एजेन्डा अर्थात् वैशाखमै नियमित महाधिवेशन गरेर जाने पक्षमा उभिने निर्णय गरेको बताए । यद्यपि, दुई समूहबीच सहमतिको बिन्दु खोज्ने र विशेष महाधिवेशनलाई मान्न नसक्ने निर्णय गरेको पनि उनले बताए ।
