०६ साउन २०८३, बुधबार
रुपन्देहीको देवदहमा आउँदो पुस अन्तिम सातादेखि दशौं राष्ट्रिय देवदह औद्योगिक व्यापार मेला तथा कृषि तथा पर्यटन महोत्सव हुने भएको छ । उद्योग व्यापार संघ देवदहको आयोजनामा हुने महोत्सवको तयारी तीव्र बनाइएको छ ।
‘राष्ट्रिय स्वाधीनताका लागि राष्ट्रिय अर्थतन्त्र, राष्ट्रिय अर्थतन्त्रका लागि राष्ट्रिय औद्योगीकरण तथा व्यापार विविधीकरण’ नाराका साथ पुस २३ गतेदेखि आयोजित महोत्सव माघ ६ गतेसम्म चल्नेछ ।
मेला आयोजक समितिका संयोजक तथा देवदह उद्योग व्यापार संघका अध्यक्ष गणेशकुमार खातीले महोत्सवले देवदहको ऐतिहासिक सांस्कृतिक, धार्मिक, कृषि एवं पर्यटकीय स्थलहरूको प्रचारप्रसारलाई विशेष जोड दिइने बताए ।
महोत्सव करिब ५ लाख दर्शकले अवलोकन गर्ने र ११ करोड बढीको कारोबार हुने अनुमान गरिएको छ ।
महोत्सवमा कृषि, गार्मेन्ट, हस्तकला, स्थानीय उत्पादनलाई प्रोत्साहन तथा बजारीकरण गर्न महोत्सवले भूमिका खेल्ने खातीले बताए ।
देवदह उद्योग व्यापार संघका संस्थापक अध्यक्ष गोविन्द ठड्राइले यो वर्षको महोत्सव फरक र नयाँपन प्रदान गर्ने गरी आयोजक अघि बढेको बताए ।
संस्थाका सचिव धनबहादुर कुँवरले आकर्षक प्रवेशद्वारसहित देवदह आइडल, देवदह गायक प्रतिस्पर्धा, भोजन मण्डलीका साथ विभिन्न राष्ट्रिय तथा स्थानीय कलाकारको हरेक दिन प्रस्तुति रहने बताए ।
देवदहमा २०७१ देखि निरन्तर व्यापार मेला हुँदै आएको छ ।
