अख्तियार दुरुपयोग अनुसन्धान आयोगले सहसचिव तीर्थराज भट्टराईसहित तीन जनाविरुद्ध सम्पत्ति शुद्धीकरण कसुर अन्तर्गतको मुद्दा पेस गरेको छ । 

अख्तियारले बिहीबार त्रिभुवन अन्तर्राष्ट्रिय विमानस्थल अध्यागमन कार्यालयका तत्कालीन प्रमुख समेत रहेका सहसचिव भट्टराईसहित तीन जनाविरुद्ध घुस रिसवतसँगै सम्पत्ति शुद्धीकरणको समेत मुद्दा पेस गरेको हो ।

विशेष अदालतका सूचना अधिकारी यज्ञ‍राज रेग्मीका अनुसार सहसचिव भट्टराईसँगै तत्कालीन अध्यागमन अधिकृत यज्ञराज अर्याल र जग्गा व्यवसायी खेम प्रसाद सुवेदीविरुद्ध उक्त मुद्दा पेस भएको हो । 

तीनै जनाविरुद्ध १ करोड ३ लाख ७९ हजार ६ सय रूपैयाँ सम्पत्ति शुद्धीकरण गरेको भन्दै अभियोगपत्र पेस भएको हो ।