०४ साउन २०८३, सोमबार
नेपाली राष्ट्रिय महिला फूटबल टोलीकी प्रभावशाली स्ट्राइकर सावित्रा भण्डारी ‘साम्बा’ ले अस्ट्रेलियन महिला लिग (ए–लिग) मा पहिलो गोल गरेकी छन् ।
सावित्राको दुई गोलसँगै उनको टोली वेलिङ्टन फोनिक्सले शनिबार सम्पन्न खेलमा सिड्नी एफसीलाई ७–० को फराकिलो अन्तरले हरायो ।
महिला ए–लिगमा जोडिएयता वेलिङ्टन फोनिक्सले हासिल गरेको यो सबैभन्दा ठूलो अन्तरको जित पनि हो । फोनिक्सले यसअघि सन् २०२३ मा क्यानबेरा युनाइटेडलाई ५–० गोलले हराएको थियो ।
खेल शुरू भएको १३औं मिनेटमै सावित्राले पहिलो गोल गरेकी थिइन् । महिला ए–लिगमा सावित्राले गरेको यो पहिलो गोल हो ।
वेलिङ्टन फोनिक्सले खेलको पहिलो हाफमै ३–० को अग्रता लिएको थियो । साम्बाका अतिरिक्त ग्रेस जेलले पनि दुई गोल गरिन् ।
