नेपाल क्रिकेट संघ (क्यान)ले आईसीसी पुरुष टी–२० विश्वकप क्रिकेट प्रतियोगिताको बन्द प्रशिक्षणका लागि २४ सदस्यीय टोलीको घोषणा गरेको छ ।

शनिबार साँझ सार्वजनिक गरिएको टोलीमा रोहितकुमार पौडेल, दीपेन्द्रसिंह ऐरी, सन्दीप लामिछाने, कुशल भुर्तेल र आसिफ शेख रहेका छन् ।

यसैगरी, कुशल मल्ल, सन्दीप जोरा, गुलसन झा, सोमपाल कामी, नन्दन यादव, ललित राजवंशी र लोकेश बलले पनि टोलीमा स्थान पाएका छन् ।

यसैगरी, आरिफ शेख, आदिल अन्सारी, करण केसी, साहब आलम, शेर मल्ल, भीम सार्की, इशान पाण्डे, बसिर अहमद, विनोद भण्डारी, अविनाश बोहरा, प्रतिस जीसी र रुपेश सिंह पनि टोलीमा परेका छन् ।

आईसीसी टी–२० विश्वकपको १०औं संस्करण सन् २०२६ को फेब्रुअरी ७ देखि मार्च ८ तारिखसम्म भारत र श्रीलंकामा संयुक्त रूपमा आयोजना हुँदैछ ।

प्रतियोगितामा २० टोलीको सहभागिता रहेको छ । सहभागी टोलीलाई चार समूहमा विभाजन गरिएको छ । नेपाल प्रतियोगिताको समूह ‘सी’ मा परेको छ ।

उक्त समूहमा नेपालसँगै बंगलादेश, इङ्ल्यान्ड, वेस्ट इन्डिज र इटाली रहेका छन् । त्यसमध्ये इङ्ल्यान्ड, वेस्ट इन्डिज र बंगलादेश टेस्ट राष्ट्र हुन् ।

नेपाली टोलीले तेस्रो पटक आईसीसी टी–२० विश्वकप खेल्न लागेको हो । नेपालले सन् २०१४ मा पहिलो र सन् २०२४ मा दोस्रो पटक टी–२० विश्वकप खेलेको थियो ।