२२ असार २०८३, सोमबार
भक्तपुरको ठिमीमा एक व्यक्तिले आफ्नै कन्चटमा गोली प्रहार गरेका छन् । गोली लागेर उनको मृत्यु भएको छ ।
जिल्ला प्रहरी परिसर भक्तपुरका डीएसपी तथा प्रवक्ता प्रकाश जबेगुका अनुसार कन्चटमा गोली हान्ने व्यक्ति सनिप चाम्लिङ राई रहेका छन् ।
घटनास्थलमा स्वचालित हतियार समेत फेला परेको छ । उनले कसरी उक्त हतियार ल्याए र आफैंलाई गोली हान्नुको कारण के हो भन्नेबारे अनुसन्धान भइरहेको डीएसपी जबेगुले जानकारी दिए । घटनास्थलमा प्रहरी वृत्त ठिमीको टोली पुगेको छ ।
मध्यपुर ठिमी नगरपालिका–६ राई टोल बस्दै आएका राई अविवाहित रहेको प्रहरीले जनाएको छ ।
सोमबार दिउँसो साढे ३ बजेतिर साढे चार तले पक्की घरको चौथो तलामा राईले कोठाभित्र चुकुल लगाएर आफैंले कन्चटमा गोली हानेको प्रहरीले बताएको छ ।
