२८ जेठ २०८३, बिहीबार
नेपाल प्रहरीमा लामो प्रतीक्षा र प्रयासपछि दरबन्दी हेरफेर भएको छ । सोमबार सिंहदरबारमा बसेको मन्त्रिपरिषद् बैठकले गृह मन्त्रालयले पेश गरेको दरबन्दी हेरफेरको प्रस्तावलाई स्वीकृति प्रदान गरेको हो ।
त्यसो त गृहले प्रहरीको संगठन व्यवस्थापन तथा सर्वेक्षण (ओएन्डएम) समिति बनाएको थियो ।
गृहका सहसचिव एवं प्रशासन महाशाखा प्रमुख कालीप्रसाद पराजुलीको संयोजकत्वमा बनेको ओएन्डएम समितिले एक प्रहरी नायब महानिरीक्षक (डीआईजी)को दरबन्दी थपसँगै अन्य दरबन्दी हेरफेर र थप गर्ने प्रस्ताव गरेको थियो । तर, अर्थले डीआईजी बाहेकका पदमा मात्रै सहमति प्रदान गरेको थियो ।
मन्त्रिपरिषद्ले स्वीकृत गरेको दरबन्दी सूचीअनुसार जनपदतर्फ तीन जना प्रहरी वरिष्ठ उपरीक्षक (एसएसपी) थप हुने भएको छ ।
थप भएका एसएसपीलाई प्रहरी महानिरीक्षकको सचिवालय, कानून तथा मानव अधिकार महाशाखा र केन्द्रीय अनुसन्धान ब्यूरोमा जिम्मेवारी दिने भनिएको छ । यो दरबन्दी थपिँदा सवारी महाशाखा र केनाइन कार्यालयमा एसएसपीको दरबन्दी कटौती गरिएको छ ।
एसएसपीसँगै जनपदतर्फको प्रहरी उपरीक्षक (एसपी) को दरबन्दी थपिएको छ ।
थपिएका चार एसपीलाई प्रहरी प्रधान कार्यालयको जनसम्पर्क तथा मिडिया समन्वय शाखा, केन्द्रीय अनुसन्धान ब्यूरो, सिंहदरबार सुरक्षा गण र नेपाल प्रहरी अस्पतालमा जिम्मेवारी दिइने उल्लेख छ ।
जनपदतर्फ चार एसपीको दरबन्दी थप हुँदा सम्पत्ति शुद्धीकरणका एसपीको दरबन्दी भने कटौती गरिएको छ ।
गृह मन्त्रालयका प्रवक्ता एवं सहसचिव आनन्द काफ्लेका अनुसार, मन्त्रिपरिषदले स्वीकृत गरेको ओएन्डएम समितिको प्रतिवेदन कार्यान्वयनका लागि प्रहरी प्रधान कार्यालयलाई निर्देशन दिइएको छ ।
प्राविधिकतर्फ ९ एसपीको दरबन्दी थपियो
मन्त्रिपरिषदले स्वीकृत गरेको ओएन्डएम प्रतिवेदनअनुसार प्राविधिकतर्फ ९ जना एसपीको दरबन्दी थप भएको छ । ९ मध्ये ८ एसपीलाई प्रहरी अस्पतालमा र एक जनालाई प्रहरीको विधिविज्ञान प्रयोगशालामा जिम्मेवारी दिइने उल्लेख छ ।
प्राविधिकतर्फ ९ एसपी थपिँदा नेपाल प्रहरी संगीत विद्यालयमा एसपीको दरबन्दी कटौतीमा परेको छ ।
कटौतीमा नगरी ३ डीएसपीको दरबन्दी थपियो
ओएन्डएम समितिको प्रस्तावअनुसार गृहले मन्त्रिपरिषद् बैठकमा पेश गरेको सूचीअनुसार जनपदतर्फ तीन डीएसपीको दरबन्दी थप्ने कुरा स्वीकृत भएको छ ।
स्वीकृत दरबन्दीमध्ये नेपाल प्रहरी प्रधान कार्यालयको कानून शाखामा १ जना, अन्वेषण योजना तथा विकास निर्देशनालयमा १ जना र केन्द्रीय अनुसन्धान ब्यूरोमा १ जना गरी तीन डीएसपीलाई खटाइने उल्लेख छ ।
जनपदतर्फ डीएसपीको दरबन्दी थप हुँदा अन्यतर्फ दरबन्दी कटौतीमा परेको छैन ।
तर, प्राविधिकतर्फ दुई डीएसपीको दरबन्दी थप हुँदा अख्तियार दुरुपयोग अनुसन्धान आयोगको प्रहरी महाशाखामा रहेको फरेन्सिक युनिटका एक डीएसपीको दरबन्दी कटौतीमा परेको छ ।
थपिएका प्राविधिक डीएसपीलाई सवारी महाशाखा र प्रहरी प्रधान कार्यालयमा रहेको डीएफएल शाखामा जिम्मेवारी दिइने भएको छ ।
जनपदतर्फ ६ प्रहरी निरीक्षक थप
स्वीकृत ओएन्डएम प्रतिवेदनअनुसार जनपदतर्फ ६ जना प्रहरी निरीक्षक थपिएको छ ।
थपिएका प्रहरी निरीक्षकहरूलाई क्रमश: कानून महाशाखामा दुईजना, अन्वेषण योजना तथा विकास निर्देशनालयमा २ जना र केन्द्रीय अनुसन्धान ब्यूरोमा दुई जनालाई जिम्मेवारी दिइने उल्लेख गरिएको छ ।
त्यस्तै, प्राविधिकतर्फ अन्वेषणमा एकजना प्रहरी निरीक्षक थपिँदा प्रहरी अस्पतालतर्फका ८ प्रहरी निरीक्षकको दरबन्दी कटौती गरिएको छ ।
वरिष्ठ सईदेखि प्रकाससम्मको दरबन्दी थपघट
मन्त्रिपरिषद्ले स्वीकृत गरेको ओएन्डएम प्रतिवेदन अनुसार जनपद र प्राविधिकतर्फ २/२ जना प्रहरी नायब निरीक्षक (सई) को दरबन्दी थपिएको छ ।
सम्पत्ति शुद्धीकरणको वरिष्ठ सईको दरबन्दी कटौती गरिएको छ ।
त्यस्तै, जनपदतर्फ प्रहरी सहायक निरीक्षक (असई) को एउटा दरबन्दी पनि थप गरिएको छ । प्राविधिकतर्फ एकजना प्रहरी वरिष्ठ हवल्दार, एक सहायक हवल्दार र जनपदतर्फ ५ जना जवानको दरबन्दी थप भएको छ । यो दरबन्दी जिल्ला प्रहरी परिसर काठमाडौंमा थपिने छ ।
जनपदतर्फ सम्पत्ति शुद्धीकरण विभागको प्रहरी शाखाका दुई सई, तीन हवल्दार, ८ जना सहायक हवल्दार, १५ जवान र एकजना प्रहरी कार्यालय सहयोगीको दरबन्दी कटौती गरिएको छ ।
प्राविधिकर्फ भने सवारी महाशाखाको हवल्दारको तीनवटा दरबन्दी कटौती भएको छ ।
त्यस्तै, जनसम्पर्क शाखा र श्रव्यदृश्य शाखाको सईको दरबन्दी पनि कटौती गरिएको छ । प्राविधिकतर्फकै श्रव्यदृश्य शाखाको सहायक हवल्दारको दरबन्दी कटौती गरिएको छ ।
थपिएको पद
एसएसपी– ३
एसपी– ४
एसपी (प्राविधिक) – ९
डीएसपी – ३
डीएसपी प्राविधिक – २
प्रहरी निरीक्षक – ६
प्रहरी निरीक्षक (प्राविधिक) – १
सई – २
सई (प्राविधिक) – २
असई – १
वरिष्ठ हवल्दार (प्राविधिक) – १
सहायक हवल्दार (प्राविधिक)– १
जवान – ५
कटौती गरिएको दरबन्दी
एसएसपी (प्राविधिक) – २
एसपी (प्राविधिक) – १
एसपी – १
डीएसपी (प्राविधिक) – १
प्रहरी निरीक्षक – १
प्रहरी निरीक्षक (प्राविधिक) – ८
वरिष्ठ सई – १
सई – १
सई (प्राविधिक) – २
वरिष्ठ हबल्दार (प्राविधिक) – १
हवल्दार – ३
हवल्दार (प्राविधिक) – ३
सहायक हवल्दार – ८
सहायक हवल्दार (प्राविधिक) – १
प्रहरी जवान – १५
प्रहरी कार्यालय सहयोगी – १
