२५ जेठ २०८३, सोमबार
उदयपुरको चौदण्डीगढी नगरपालिका–६ स्थित सातधारेमा तीन दिने निःशुल्क आँखा शल्यक्रिया सेवा शिविर शुरू भएको छ ।
नगरपालिकाको सहयोगमा काठमाडौंस्थित तिलगंगा आँखा अस्पतालका वरिष्ठ चिकित्सक डा. सन्दुक रुइतको टिमले निःशुल्क आँखा शल्यक्रिया सेवा शुरू गरेको हो ।
सोमबारदेखि शुरू भएको शिविरमा पाँच सय बढी आँखाका बिरामीको जलविन्दु र मोतियाविन्दुसम्बन्धी शल्यक्रिया गरिने चौदण्डीगढी नपाकी उपप्रमुख मणिकादेवी दुलालले बताए ।
पहिलो दिनमै १२५ जनाको जलविन्दु र मोतियाविन्दुसम्बन्धी उपचार गरिएको चौदण्डीगढी नगरपालिकाले जनाएको छ ।
आँखाको उपचार र शल्यक्रिया सेवाका लागि चौदण्डीगढीसहित त्रियुगा र बेलका नगरपालिका क्षेत्रबाट पनि ठूलो सङ्ख्यामा आँखाका बिरामी शिविरमा पुगेको जनाएको छ ।
