१२ असार २०८३, शुक्रबार
प्रजातान्त्रिक गणतन्त्र कङ्गोको पूर्वी क्षेत्रमा विद्रोही लडाकू समूहको कब्जामा रहेको एक खानीमा ‘विशाल’ पहिरो गएको सरकारले आइतबार जनाएको छ । प्रारम्भिक जानकारी अनुसार पहिरोमा परी कम्तीमा २०० जनाको मृत्यु भएको आशङ्का गरिएको छ ।
सन् २०२१ मा एम–२३ भनिने स्रोत–समृद्ध पूर्वको विशाल भूभाग कब्जा गरेको एक सशस्त्र समूहले सन् २०२४ अप्रिलमा रुवान्डाको सहयोगमा उत्तरी किभु प्रान्तको रुबाया खानी कब्जा गरेको थियो ।
राजधानीबाट निकै टाढा रहेको खानी नजिकै रहेको सुरक्षा निकायका अनुसार पहाडको एक भाग बुधबार दिउँसो भत्किएको र त्यहाँको अर्को भागमा बिहीबार बिहान दोस्रो पहिरो गएको थियो ।
एम–२३ का गभर्नर इरास्टन बाहाटी मुसाङ्गाले आइतबार एएफपीसँग भने, “पहिरोमा परी कम्तीमा २०० जनाको मृत्यु भएको आशङ्का गरिएको छ।”
त्यहाँ धेरै दिनदेखि फोन नेटवर्क बन्द छ । कङ्गोका अधिकारी र नागरिक समाज समूहहरू एम–२३ लडाकू समूह घटनास्थलमा आइपुगेपछि क्षेत्र छोडेर भागेका थिए ।
“यस क्षेत्रमा सक्रिय मोटरसाइकल यात्रीहरूले घटनास्थलबारे सूचना ल्याइरहेका छन् तर फरक–फरक सूचकहरूले मृतक सङ्ख्याको फरक–फरक विवरण ल्याएका छन् । यसको स्वतन्त्र पुष्टि गर्न विद्रोहीले नियन्त्रित क्षेत्रमा सञ्चारकर्मी पुग्न कठिन भएको किन्सासास्थित एक सरकारी अधिकारीले बताए ।
रुबाया खानीले ल्यापटप र मोबाइल फोन जस्ता इलेक्ट्रोनिक्सको उत्पादनमा प्रयोग हुने कोल्टनको विश्वव्यापी आपूर्तिको १५ देखि ३० प्रतिशत उत्पादन गर्छ ।
विज्ञहरूको अनुमान अनुसार एम–२३ ले कोल्टनको उत्पादन र बिक्रीबाट प्रति किलो सात डलर कर लिने गरेको छ र खानिबाट प्रति महिना करिब आठ लाख अमेरिकी डलर कमाउने गरेको छ ।
विश्वव्यापी कोल्टनको कम्तीमा ६० प्रतिशत हिस्सा ओगटेको प्रजातान्त्रिक गणतन्त्र कङ्गोको फराकिलो पूर्वी क्षेत्र सुन र टिनको विशाल भण्डार क्षेत्र पनि हो ।
