१९ असार २०८३, शुक्रबार
रोटरी क्लब अफ नागार्जुनले आफ्नो २२औं स्थापना दिवसको अवसरमा उपत्यका ट्राफिक प्रहरीलाई उच्च गुणस्तरका कम्प्युटर र प्रिन्टर सहयोग प्रदान गरेको छ ।
रोटरी डिष्ट्रिक्ट ३२९२ का डिष्ट्रिक्ट गभर्नर विनोद कोइरालाले क्लबका तर्फबाट उपत्यका ट्राफिक प्रहरी कार्यालयका प्रहरी वरिष्ठ उपरीक्षक नवराज अधिकारीलाई तीन थान कम्प्युटर र एक थान प्रिन्टर सहयोग हस्तान्तरण गरेका हुन् ।
करिब २ सय जना उच्चपदस्त ट्राफिक प्रहरीहरूको उपस्थितिमा ट्राफिक प्रहरी कार्यालय रामशाहपथमा आयोजित कार्यक्रममा रोटरी डिष्ट्रिक्ट ३२९२ का डिष्ट्रिक्ट गभर्नर कोइरालाले क्लबको तर्फबाट सानो सहयोग गरिएको बताए । आगामी दिनमा पनि निरन्तर सहयोग गर्ने उनको प्रतिबद्धता छ ।
त्यसैगरी प्रहरी वरिष्ठ उपरीक्षक अधिकारीले रोटरीलगायतका सामाजिक संस्थाहरूकै कारण ट्राफिकको पोसाकदेखि भवन निर्माण र भौतिक संरचनामा धेरै ठूलो योगदान पुगेको बताए ।
उक्त सामग्री हस्तान्तरण कार्यक्रममा क्लबका अध्यक्ष विशाल गैरेले ट्राफिक प्रहरी कार्यालयलाई निरन्तर सहयोग गर्ने बताए ।
जेनजी आन्दोलनका बेला रोटरी क्लब अफ नागार्जुनका पूर्वअध्यक्ष शम्भु अमगाईंले क्लबका तर्फबाट भौतिक निर्माण र रेट्रोफिटिङमा पुर्याएको योगदानका लागि प्रहरी महानिरीक्षक दानबहादुर कार्कीले समेत गरेका थिए ।
सहयोग हस्तान्तरण कार्यक्रममा रोटरी डिष्ट्रिक्ट असिस्टेन्ट गभर्नर मञ्जु धमला, डिष्ट्रिक्ट सेक्रेटरी अनिस बज्राचार्य र रोटरी क्लब अफ नागार्जुनका तर्फबाट निवर्तमान अध्यक्ष सतिस शर्मा, सचिव अर्जुन खड्का र कोषाध्यक्ष निखिल अग्रवालको सहभागिता रहेको थियो ।
