भारतीय कांग्रेस पार्टीले असम बीजेपीको आधिकारिक ‘एक्स’ ह्यान्डलबाट पोस्ट गरिएको एक भिडियोको कडा निन्दा गरेको छ । कांग्रेसले अदालतसँग अपिल गर्दै ‘खुला रूपमा हिंसाको आह्वान गर्नेहरू’विरुद्ध कडा कारबाही गर्न माग गरेको छ ।

असम बीजेपीको ‘एक्स’ ह्यान्डलबाट शेयर गरिएको उक्त भिडियोमा मुख्यमन्त्री हिमन्त बिस्वा सरमालाई मुस्लिम समुदायलाई लक्षित गर्दै बोलिरहेको देखाइएको थियो । भिडियो भाइरल भएपछि यसको व्यापक आलोचना भएपछि बीजेपीले उक्त भिडियो हटाएको छ ।

कांग्रेसले ‘एक्स’ मा लेखेको छ,‘बीजेपीको आधिकारिक असम प्रदेश ह्यान्डलले एक भिडियो पोस्ट गरेको थियो । जसमा अल्पसंख्यक समुदायलाई लक्षित गर्दै ‘प्वाइन्ट–ब्ल्याङ्क’ हत्या प्रोत्साहन गरिएको देखिन्छ।’

कांग्रेसले यो अत्यन्तै घिनलाग्दो र चिन्ताजनक भन्दै सामान्य ट्रोल सामग्री भनेर बेवास्ता गर्न नसकिने उल्लेख गरेको छ । यसले समाजमा ठूलो स्तरको हिंसा र नरसंहारको आह्वानको जस्तो संकेत गरेको उसको भनाइ छ ।  

कांग्रेसले थप भनेको छ,‘यसले दशकौँदेखि घृणालाई पलाउन दिएको र पछिल्ला ११ वर्षमा त्यसलाई सामान्य बनाउने प्रयास गरेको यस फासीवादी सरकारको वास्तविक अनुहार देखाउँछ । विषयको गम्भीरतालाई ध्यानमा राख्दै समाजमा विष र अशान्ति फैलाउने यस्ता गतिविधिविरुद्ध कडा कारबाही हुनुपर्छ ।’

कांग्रेसले प्रधानमन्त्रीबाट यस्ता विषयमा निन्दाको अपेक्षा छ नगरेको भन्दै जिम्मेवारी तय हुने आशा पनि नभएको बताएको छ । तर न्यायपालिकाले यस मामलामा दृढ कदम चाल्नुपर्ने कांग्रेसले भनेको छ ।