२९ असार २०८३, सोमबार
हुम्लाको दुर्गम क्षेत्र हल्जीमा मतदान केन्द्रको अवस्था सामान्य बनेको छ ।
बिहीबार दिउँसो २ बजेतिर तनाबपूर्ण अवस्था बनेपछि मतदान केहीबेर स्थगित गरिएको थियो । अहिले अवस्था सामान्य बनेको र मतदाताहरूलाई पर्खिरहेको मतदानमा खटिएका एक कर्मचारीले जानकारी दिए ।
नाम्खा गाउँपालिका–६ हल्जीस्थित सुनखानी प्रावि हल्जी मतदानस्थलमा स्थिति तनावपूर्ण बनेको थियो ।
हल्जी गुम्बामा बसोबास गर्ने लामाहरूले मतदानका लागि वारेसनामा दिन पाउनुपर्ने तथा गुम्बामा रहेका ५/६ जना बिरामीलाई मतदान गर्न मतपेटिका गुम्बासम्म लैजानुपर्ने माग गरेपछि विवाद भएको थियो ।
तर कानून अनुसार त्यसरी मतपेटिका अन्यत्र लैजान नमिल्ने भनेपछि विवाद भएको थियो ।
‘मुख्य निर्वाचन अधिकृत र प्रमुख जिल्ला अधिकारीज्यूले कानून विपरीत काम नगर्नू, मतदानलाई शान्तिपूर्ण रूपमा सम्पन्न गर्नु भन्ने निर्देशन दिनुभएको छ । हामी मतदातालाई कुरेर बसिरहेका छौं’, ती कर्मचारीले भने ।
