११ साउन २०८३, सोमबार
दाङको एक मतदान केन्द्रमा मतदाताले मतदान बहिष्कार गरेका छन् ।
निर्वाचन क्षेत्र नम्बर ३ अन्तर्गत बबई गाउँपालिका-७ मा रहेको मलई मतदानस्थल रहेको देउती आधारभूत विद्यालय केन्द्रमा कुनै मतदाता सहभागी भएनन् । यहाँ ५३० जना मतदाता थिए ।
यसैगरी, बबई गाउँपालिका-१ को आधारभूत विद्यालय जिला केन्द्रमा जम्मा १० मत खसेको छ । यहाँ ६८२ जना मतदाता रहेका थिए ।
यो क्षेत्र बाँके राष्ट्रिय निकुञ्जको मध्यवर्ती क्षेत्र अन्तर्गत पर्छ । स्थानीयहरूले बस्ती सार्नका लागि पटक पटक अनुरोध गरे पनि कुनै दलले चासो नदेखाएको भन्दै मतदान बहिष्कार गरेका हुन् ।
मतदान अघिबाटै चुनाव बहिष्कार गर्ने जनाएका मतदाताले आफूहरूलाई सबै सरकारले नजरअन्दाज गरेको भन्दै मतदानमा सहभागी नभएका हुन् ।
आफूहरूको समस्या समाधान नहुञ्जेलसम्म कुनै पनि निर्वाचनमा भाग नलिने बताएका छन् ।
