१७ असार २०८३, बुधबार
एक मुद्दाको सुनुवाइका क्रममा मंगलबार उच्च अदालत पाटन पुगेका अखिल नेपाल फुटबल संघ (एन्फा) का पूर्वअध्यक्ष गणेश थापा इजलासमै आक्रोशित रूपमा प्रस्तुत भएका छन् ।
एन्फाका उपाध्यक्ष विराटजंग शाहीले आफू आबद्ध संस्था एन्फासँगै युवा तथा खेलकुद मन्त्रालय, राष्ट्रिय खेलकुद परिषद् (राखेप) लगायतलाई विपक्षी बनाएर दायर गरेको रिट माथिको सुनुवाइ मंगलबारका लागि तोकिएको थियो ।
रिटको पेशी न्यायाधीशद्वय गणेशप्रसाद बराल र तेजेन्द्रप्रसाद शर्मा सापकोटाको इजलासमा परेको थियो । शाहीको वारेसका रूपमा थापा पनि इजलासमा उपस्थित भएका थिए ।
पहिले शाहीका कानून व्यवसायीले मुद्दामा केन्द्रित रहेर बहस गरेका थिए । त्यसपछि एन्फा पक्षका कानून व्यवसायीले बहस गरिरहेका थिए ।
एन्फातर्फका केही कानून व्यवसायीले बहस गरिसकेपछि न्यायाधीशले मुद्दाको प्रमाण मिसिल साथै राख्ने र सुनुवाइको अर्को मिति चैत ८ गते आइतबारका लागि तोक्ने विषयमा पक्षहरूसँग सल्लाह गरेका थिए ।
न्यायाधीशको सल्लाहमा एन्फा पक्षका कानून व्यवसायी सहमत देखिए । तर, तल बसेर कानून व्यवसायीको बहस सुनिरहेका एन्फाका पूर्वअध्यक्ष थापाले तत्कालै प्रतिवाद गरे ।
‘श्रीमान्, हामी न्याय माग्न आएका हौं । सुनुवाइको मिति अर्को आइतबार राख्दा हामीमाथि घोर अन्याय हुन्छ । यसमा हामी सहमत छैनौं,’ न्यायाधीशलाई सम्बोधन गर्दै थापाले भने ।
त्यसपछि एन्फा पक्षका कानून व्यवसायीले असम्बद्ध व्यक्तिलाई मुद्दाको विषयमा बोल्ने कुनै अधिकार नभएको दाबी गर्दै थापालाई चुप लगाउन न्यायाधीशसँग आग्रह गरे । लगत्तै थापा विपक्षी कानून व्यवसायीमाथि खनिए ।
‘म वादीको वारेसका रूपमा उपस्थित भएको हुँ । मैले श्रीमानहरूको अनुमति लिएर बोलेको हुँ । मलाई बोल्नबाट बन्चित गर्ने तपाईँहरूको को हो ? अरूको विषयमा किन हस्तक्षेप गर्नुहुन्छ ? तपाईँहरू आफ्नो काम गर्नुस् । म आफ्नो धारणा राख्छु,’ विपक्षीका कानून व्यवसायीलाई सम्बोधन गर्दै थापा झनै खरो रूपमा प्रस्तुत भए ।
थापाले एन्फाको निर्वाचन चैत १३ गतेका लागि तोकिएकाले चैत ८ गते सुनुवाइको मिति तोक्दा आफूहरू अन्यायमा पर्ने दोहोर्याए । अर्कोतिर, न्यायाधीशले चैत ८ गते सुनुवाइका लागि उपयुक्त समय हुने धारणा राखे ।
त्यसपछि राष्ट्रिय टोलीका पूर्व कप्तानसमेत रहेका थापा झनै आक्रोशित बन्न पुगे । ‘न्यायालयबाट न्याय पाइन्छ भन्ने कुरामा विश्वासै लाग्न छाड्यो । एउटा पक्षको मात्र कुरा सुनिन्छ भने हामी उपस्थित हुनुको कुनै अर्थ छैन,’ थापाले भने ।
न्यायाधीशले पटक–पटक थापालाई शान्त रहन आग्रह गरिरहे । तर, थापाले पनि आफ्नो धारणा राखी रहे । ‘जबरजस्ती आइतबारकै लागि सुनुवाइको मिति तोकिन्छ भने तोके हुन्छ । तर, म आउँदिन । जे गरे पनि हुन्छ,’ थापाले भने ।
थापा चर्को आवाजमा प्रस्तुत हुँदा न्यायाधीशले उनलाई न्यायालयको मर्यादामा बस्न आग्रह गरे । तर, थापा रोकिएनन्, ‘विपक्षीका कानून व्यवसायीले राखेका धेरै कुरा अन्योलपूर्ण छन् । हामी त्यसलाई स्पष्ट पार्न चाहन्छौं । हामीले पनि आफ्नो कुरा राख्न पाउनुपर्छ,’ उनले भने ।
न्यायाधीशले फेरि न्यायालयको सम्मान गर्न आदेश दिएपछि थापा केही नरम बने । तर, उनले बोल्न भने छाडेनन्, ‘मबाट गल्ती भएको भए क्षमा माग्न चाहन्छु, श्रीमान् । म खेलाडी हुँ । मैदानमा रेफ्रीले रातो कार्ड देखाउँदा पनि हामी खेलाडी रेफ्रीको सम्मान गर्छौं । झन् न्यायालयको सम्मान नगर्ने त कुरै भएन । न्यायालयले पनि हाम्रो भावना बुझ्नुपर्छ,’ उनले नरम स्वरमा भने ।
त्यसपछि न्यायाधीशद्वयबाट दुबै पक्षको सहमतिमा सुनुवाइको अर्को मिति ‘पर्सि’का लागि तोक्ने आदेश आएको थियो । लगत्तै, थापा पनि पुन: न्यायाधीशसँग माफी माग्दै आफ्नो कागजात बोकेर इजलासबाट बाहिरिएका थिए ।
राखेपको आदेशविपरीत एन्फाको निर्वाचन चैत १३ गते हुँदैछ । निर्वाचन समितिले उम्मेदवारी दर्तादेखि लिएर उम्मेदवारको अन्तिम नामावली पनि सार्वजनिक गरिसकेको छ । शाहीले भने एन्फाको कमजोरीका कारण आफूले उम्मेदवारी दिन नपाएको दाबीसहित न्यायालयमा रिट दायर गरेका छन् ।
