०२ साउन २०८३, शनिबार
अखिल नेपाल फुटबल संघ (एन्फा)को आयोजनामा काठमाडौंमा जारी ‘एन्फा राष्ट्रिय लिग फुटबल प्रतियोगिता’मा नियमविपरीत विदेशी खेलाडीलाई खेलाइएको विषयमा सम्बन्धित निकायहरूले छानबिन प्रक्रिया अगाडि बढाएका छन् ।
राष्ट्रिय लिगमा सहभागी विभिन्न क्लबले नियमविपरीत विदेशी खेलाडीलाई खेलाइरहेको भन्दै उजुरी परेपछि छानबिन अगाडि बढाइएको हो ।
एन्फा लिगमा १७ वटा क्लबको सहभागिता रहेको छ । त्यसमध्ये तीन विभागीयबाहेक अधिकांश क्लबबाट विदेशी खेलाडीले खेलिरहेका छन् ।
पर्यटक भिसामा नेपाल घुम्न आएका विदेशीलाई खेलाडीका रूपमा राष्ट्रिय लिगमा सहभागी गराइएको उजुरीमा उल्लेख छ । यसरी नेपाली क्लबहरूले विदेशी खेलाडीलाई आफ्नो टोलीबाट खेलाउँदा अनिवार्य श्रम स्वीकृति लिनुपर्ने कानूनी प्रावधान छ ।
नेपाली खेलकुदको नेतृत्वदायी निकाय राष्ट्रिय खेलकुद परिषद् (राखेप) ले यस विषयमा एन्फासँग विस्तृत विवरण माग गरेको छ ।
‘नियम विपरीत विदेशी खेलाडीलाई खेलाएको भन्दै उजुरी परेकाले हामीले एन्फासँग विवरण माग गरेका छौँ,’ राखेपअन्तर्गत संघ–संस्था समन्वय शाखाका प्रमुख चन्द्रकुमार राईले लोकान्तरसँग भने ।
‘श्रम स्वीकृती/इजाजत लिई वा नलिई कुन–कुन क्लबबाट कुन–कुन देशका विदेशी नागरिक के कस्तो भूमिकामा राष्ट्रिय लिगमा सहभागी छन् ? नामावलीसहित विस्तृत विवरण परिषदमा यथाशीघ्र पेश गर्नु हुन अनुरोध छ,’ राखेपद्वारा एन्फालाई पठाइएको पत्रमा भनिएको छ ।
राखेपले चैत १ गते नै एन्फालाई पत्र पठाए पनि हालसम्म कुनै जवाफ प्राप्त नभएको जानकारी पनि राईले दिए । ‘हामीले सबै विदेशी खेलाडीको विवरण माग गरेका छौँ । तर, अहिलेसम्म एन्फाबाट कुनै जवाफ प्राप्त भएको छैन,’ उनले भने ।
नियमविपरीत विदेशी खेलाडी खेलाएको विषयमा श्रम रोजगार तथा सामाजिक सुरक्षा मन्त्रालय अन्तर्गत श्रम तथा व्यवसायजन्य सुरक्षा विभागमा उजुरी परेको हो । त्यसपछि विभागले अनुसन्धान अगाडि बढाउँदै राखेपसँग थप विवरण माग गरेको थियो ।
श्रम ऐन २०७४ को दफा २२, २३ र २४ तथा श्रम नियमावली २०७५ को नियम ७ देखि १५ सम्मको व्यवस्था अनुसार, श्रम इजाजत नलिई विदेशी कामदारलाई काममा लगाउन पाइँदैन ।
गत पुस ३० गतेदेखि शुरू भएको एन्फा राष्ट्रिय लिगको तेस्रो संस्करण अहिले जारी छ ।
प्रतियोगितामा नाइजेरिया, क्यामरुन, घाना, गाम्बिया, उज्बेकिस्तान, आइभरी कोस्ट, प्यालेस्टिन, जापान, बुर्किना फासोलगायतका राष्ट्रका खेलाडी सहभागी छन् ।
अध्यागमन विभागले पनि यस विषयमा छानबिन अगाडि बढाएको छ ।
‘राष्ट्रिय लिगमा नियमविपरित विदेशी खेलाडीलाई खेलाइएको विषय हाम्रो जानकारी पनि आएको छ । हामीले पनि यस विषयमा छानबिन अगाडि बढाएका छौँ,’ विभागका महानिर्देशक रामचन्द्र तिवारीले लोकान्तरसँग भने ।
विभागले एन्फा अध्यक्षलाई सम्पर्क गर्न खोजे पनि उनले फोन नउठाएको तिवारीले बताए ।
‘राष्ट्रिय लिग आयोजना हुँदैछ । हामी आफैँ त्यहाँ जाँदा नराम्रो सन्देश जान सक्छ । त्यसैले हामीले एन्फा अध्यक्षसँग सम्पर्क गर्न खोज्यौँ, तर उहाँले फोन उठाउनु भएन,’ महानिर्देशक तिवारीले भने ।
उनका अनुसार, बिहीबार थप अनुसन्धान अगाडि बढाइने छ ।
‘आवश्यक परे बिहीबार एन्फा अध्यक्षलाई विभागमै बोलाएर जानकारी लिनेछौं,’ उनले भने । जारी एन्फा लिगमा सर्वाधिक गोल गर्ने खेलाडीको सूचीमा पनि विदेशी खेलाडीहरू नै अगाडि छन् ।
सुन्नुहोस्, तिवारीसँगको कुराकानी:
यसरी श्रम स्वीकृति नलिई विदेशी खेलाडीलाई खेलाउँदा सरकारलाई राजस्व बापत प्राप्त हुने लाखौँ रुपैयाँ घाटा लाग्ने एक अधिकारीले बताए ।
यस विषयमा बुझ्न एन्फा अध्यक्ष र प्रवक्तासँग सम्पर्क गर्न खोज्दा उनीहरूको फोन उठेन ।
