२८ जेठ २०८३, बिहीबार
सूर्य नेपाल गल्फ टुर २०२५–२६ अन्तर्गतको पाँचौं प्रतियोगिता सूर्य नेपाल वेस्टर्न ओपनको उपाधि भुवन नगरकोटीले जितेका छन् । प्रतियोगिताको यो २६औं संस्करण हो ।
भुवनले शुक्रबार इभन पार ६९ खेले । उनले समग्रमा तीन अन्डर दुई सय चारको स्कोरसहित सञ्जय लामालाई एक स्ट्रोकले पछि पार्दै उपाधिमा ह्याट्रिक गरेका हुन् ।
भुवनले आफ्नो खेलजीवनमा जितेको यो १४औं उपाधि हो । उपाधिसँगै उनले एक लाख ७० हजार रुपैयाँ नगद पुरस्कार पनि प्राप्त गरे ।
यसअघि यो सिजनमा उनले सूर्य नेपाल एनपीजीए टुर च्याम्पियनसिप र सूर्य नेपाल काठमाडौं ओपनको उपाधि जितेका थिए ।
शुक्रबार चार अन्डर ६५ खेल्दै समग्रमा दुई अन्डर दुई सय पाँच स्कोरसहित सञ्जय दोस्रो भए । उनले एक लाख २५ हजार रुपैयाँ नगद पुरस्कार हात पारे ।
एमेच्योर राहुल विश्वकर्माले चार अन्डर ६५ को स्कोर कार्ड बनाए । समग्रमा एक अन्डर दुई सय ६ स्कोरसहित उनी तेस्रो स्थानमा रहे ।
धरानका गल्फर शुक्रबहादुर राईले शुक्रबार चार ओभर ७३ को प्रदर्शन गरे । समग्रमा दुई ओभर दुई सय नौ स्कोरसहित उनी चौथो भए । प्रोतर्फ तेस्रो भएका उनले एक लाख रुपैयाँ पाए ।
जयराम श्रेष्ठ समग्रमा सात ओभर दुई सय १४ स्कोरसहित पाँचौं स्थानमा चित्त बुझाए । उनले ८२ हजार रुपैयाँ नगद पुरस्कार प्राप्त गरे ।
पोखराका घरेलु गल्फर भुबबहादुर गुरुङ छैटौं भए । उनले समग्रमा आठ ओभर दुई सय १५ स्कोर बनाए । उनले ७२ हजार रुपैयाँ पुरस्कार पाए ।
समग्रमा १० ओभर दुई सय १७ स्कोरसहित भुवनकुमार रोक्का र दिनेश प्रजापतिले संयुक्त रूपमा सातौं स्थान बाँडे । उनीहरूले जनही ६५ हजार रुपैयाँ प्राप्त गरे ।
समग्रमा १२ ओभर दुई सय १९ स्कोर बनाएका तोरणविक्रम शाही नवौं भए । उनले ५१ हजार रुपैयाँ नगद पुरस्कार पाए ।
१३ ओभर दुई सय २० स्कोर बनाएका रमेश अधिकारी र सुरेश तामाङ संयुक्त रुपमा १०औं भए । उनीहरूले जनही ४४ हजार रुपैयाँ नगद पुरस्कार हात पारे ।
विजयी खेलाडीलाई सूर्य नेपाल प्रालिका डेपुटी जनरल म्यानेजर केशव प्रधान र नेपाल गल्फ संघका अध्यक्ष टासी घलेले पुरस्कार वितरण गरे ।
नेपाल प्रोफेसनल गल्फर्स एसोसिएसन (एनपीजीए) द्वारा आयोजित प्रतियोगितामा २६ प्रोफेसनल तथा १६ एमेच्योर खेलाडीको सहभागिता रहेको थियो ।
सूर्य नेपाल प्रालिद्वारा प्रायोजित प्रतियोगितामा यसपटक कुल पुरस्कार राशि वृद्धि गरिएको थियो । कुल १० लाख ५० हजार नगद पुरस्कार रहेको यो प्रतियोगितामा शीर्ष १८ स्थानसम्मका प्रोफेसनल खेलाडीले नगद पुरस्कार प्राप्त गरे ।
