काठमाडौँको भृकुटीमण्डपमा जारी २७औँ फ्लोरा एक्स्पोको दुई दिनमै ५१ लाखभन्दा बढी कारोबार भएको छ ।

 फ्लोरिकल्चर एसोसिएसन नेपालको आयोजनामा स्वच्छ वातावरण, रोजगारी तथा आर्थिक समृद्धिका लागि पुष्प व्यवसाय भन्ने मूल नाराका साथ चैत ८ गतेसम्म मेला सञ्चालन हुनेछ ।

बिहीबारदेखि सुरु भएको मेलाको पहिलो दिन नौ हजार ५०० जनाले अवलोकन गरेका थिए भने रु २१ लाख ५० हजारबराबरको कारोबार भएको फ्लोरीकल्चर एसोसिएसन नेपाल (फ्यान)का कोषाध्यक्ष राजकृष्ण बजगाईँले जानकारी दिए ।

उनका अनुसार दोस्रो दिन शुक्रबार १७ हजार ५०० दर्शकले मेला अवलोकन गरेका छन् भने रु २९ लाख ५० हजारबराबरको कारोबार भएको छ । “यससँगै दुई दिनमा कुल २७ हजार दर्शकले मेला अवलोकन गरेका छन् भने कारोबार रु ५१ लाखभन्दा बढी पुगेको छ । एक्स्पोमा व्यावसायिक ६५, अफिसियल ११, प्रतिस्पर्धात्मक दुई, फुड दुई, ल्यान्डस्केप एक, सेल्फी एक र बिवाइडी इभी कारको एक स्टल गरी कुल ८३ वटा स्टल रहेका छन्”, उनले भने ।

मेलाका संयोजक रामबहादुर तामाङले मेलामा सहभागी पुष्प व्यवसायीहरूले उत्पादन गरेका फूल तथा बिरुवा विभिन्न विधामा प्रतिस्पर्धा गराइने बताए । यस वर्षको एक्स्पोमा करिब ६० हजार दर्शकले अवलोकन गर्ने र रु एक करोड २० लाखभन्दा बढीको कारोबार हुने अपेक्षा गरिएको संयोजक तामाङको भनाइ छ ।

साथै, सामाजिक उत्तरदायित्वअन्तर्गत आज बिहान ११ः०० देखि दिउँसो ३ः०० बजेसम्म रक्तदान कार्यक्रमसमेत आयोजना भएको लायन्स क्लब अफ काठमाडौँ ग्लोबल फ्लोरिकल्चरका अध्यक्ष सीताराम लामिछानेले बताए । लायन्स क्लब अफ काठमाडौँ ग्लोबल फ्लोरिकल्चरले विगतमा पनि रक्तदान कार्यक्रम, निःशुल्क पिउने पानी वितरण गर्दै आएको छ ।