नेपाली कांग्रेसले आगामी भदौमा १५औँ महाधिवेश गर्नेगरी कार्यतालिका ल्याउने भएको छ ।

कांग्रेस सभापति गगनकुमार थापाले १५औँ महाधिवेशनको कार्यतालिकासहितको प्रस्ताव आज बस्ने केन्द्रीय कार्यसमिति बैठकमा पेश गर्ने तयारी गरेका हुन् । बैठक अब केही बेरमा पार्टी कार्यालय सानेपामा बस्दैछ । 

उनले प्रस्ताव गर्न लागेको कार्यतालिकामा साउनबाट वडा अधिवेशन शुरू गर्ने उल्लेख छ ।

भदौ २४ मा केन्द्रीय महाधिवेशन उद्घान गर्नेगरी कार्यतालिका ल्याउन लागिएको कांग्रेसका एक नेताले जानकारी दिए । 

आजको बैठकमा यससँगै उम्मेदवारसँग प्रदेशस्तरीय निर्वाचन समीक्षा,  प्रदेश तथा स्थानीय सरकारको प्रभावकारी सञ्चालन र भ्रातृ संघ, शुभेच्छुक संस्था तथा जनसम्पर्क समिति आदि एजेण्डामा छलफल हुँदैछ ।

बैठकमा २१ फागुनमा सम्पन्न निर्वाचन र त्यसबाट कांग्रेसको पक्षमा आएको नतिजाबारे समीक्षा हुने छ। बैठक सभापति थापा नेतृत्वमा बस्न लागेको हो । 

केही दिनअघि पार्टी सभापति गगन थापाले राजीनामा दिएका थिए । निर्वाचनमा पराजय भोगेका कारण नैतिकता देखाउँदै उनले राजीनामा दिएको उल्लेख गरेका थिए । तर गत शुक्रबार र आइतबार बसेको केन्द्रीय समिति बैठकले उनको राजीनामा अस्वीकृत गरेको थियो ।