प्रधानमन्त्री कप पुरुष एकदिवसीय राष्ट्रिय क्रिकेटको सोमबार सम्पन्न खेलमा सशस्त्र प्रहरी बलको एपीएफ क्लब विजयी भएको छ । जनकपुरमा खेलिएको खेलमा एपीएफ क्लबले सुदूरपश्चिम प्रदेशलाई ४५ रनले हराएको हो ।

जारी प्रतियोगितामा सुदूरपश्चिमको यो दोस्रो हार हो । सात खेल खेलेको सुदूरपश्चिम १० अंकसहित तालिकाको दोस्रो स्थानमा आसिन छ । एपीएफ क्लबको भने यो तेस्रो जित हो । सात खेल सकेको एपीएफ क्लब सात अंकसहित छैटौं स्थानमा छ ।

टस हारी पहिले ब्याटिङको निम्तो पाएको एपीएफ क्लबले निर्धारित ओभरमा नौ विकेट गुमाएर दुई सय ५९ रन बनाएको थियो । जवाफी ब्याटिङमा ओर्लिएको सुदूरपश्चिमले भने ४६.३ ओभरमा अलआउट हुनुअघि दुई सय १४ रनमात्र बनाउन सक्यो ।

पहिले ब्याटिङ गरेको एपीएफ क्लबका लागि सन्दीप जोराले अर्धशतकीय पाली खेले । उनले ४५ बलमा एक छक्का र नौ चौकाको मद्दतले ५५ रन बनाए । मध्यक्रमका ब्याट्सम्यान लोकेश बलमे पनि ४० बलमा एक छक्का र पाँच चौकाको मद्दतले ४७ रन बनाए ।

ओपनर दीपक बोहराले ६८ बलमा सात चौकाको मद्दतले ४६ रन जोडे । सुमित महर्जनले पनि ५१ बलमा एक छक्का र तीन चौकाको मद्दतले ४१ रन बटुले । सुदूरपश्चिम प्रदेशका बलर शेर मल्लले तीन तथा विकास आग्री र अशोक धामीले दुई–दुई विकेट लिए ।

जवाफी ब्याटिङ गरेको सुदूरपश्चिम प्रदेशका लागि अशोक धामीले अर्धशतकीय पाली खेले पनि टोलीको जितका लागि त्यो पर्याप्त हुन सकेन । उनले ४३ बलमा एक छक्का र सात चौकाको मद्दतले ५० रन बनाए ।

ओपनर अभिषेक पालले पनि ९० बलमा एक छक्का र तीन चौकाको मद्दतले ४४ रन जोडे । विकेटकिपर ब्याट्सम्यान दीपक बोहराले २४ र मिलन बोहराले २३ रन बटुले । अन्य ब्याट्सम्यानले गतिलो प्रदर्शन गर्न सकेनन् ।

सुदूरपश्चिम प्रदेशलाई लक्ष्यसम्म पुग्न नदिन एपीएफ क्लबका बलर युवराज खत्री एक्लैले पाँच विकेट लिए । उनले १० ओभरमा ३४ रन खर्चिए । अभिषेक गौतमले पनि दुई विकेट हात पारे ।