ऐतिहासिक गोरखा-जीतगढी पदयात्राको चौथो संस्करण शुरू भएको छ ।

ऐतिहासिक सम्पदा, संस्कृति एवं अभिलेखको संरक्षण तथा प्रवर्द्धन गरी भावी पुस्तालाई हस्तान्तरण गर्ने उद्देश्यका साथ सञ्चालन भएको उक्त पदयात्रा नेपाली सेनाको पश्चिम पृतनापति उपरथी भोलानाथ थापा र गोरखा नगरपालिकाका उपप्रमुख मसलीमाया थोकरले टर्च तथा झण्डा हस्तान्तरण गरी शुभारम्भ गरेका हुन् । 

पदयात्रामा नेपालको राष्ट्रिय झण्डा, नेपाली सेनामा सबैभन्दा पहिले खडा भएका ५ (पाँच) कम्पनीहरू (श्रीनाथ, कालीबक्स, बर्दवाणी, पुरानो गोरख तथा सबुज) तथा जीतगढी लडाइँमा सहभागी गुरूबक्स गुल्मको झण्डासहित गोरखा जिल्लामा तैनाथ श्री रुद्रध्वज गणबाट ऐतिहासिक पोसाक तथा परम्परागत बाजागाजा सहितको टोलीको सहभागिता रहेको छ ।

करिब ३०५ किलोमिटर दुरीमा सञ्चालन हुने पदयात्रा गोरखा, तनहुँ, स्याङ्जा, पाल्पा हुँदै रूपन्देहीको बुटवलस्थित जीतगढीसम्म पुगेर २०८३ वैशाख ७ गते विजय उत्सव समारोहका साथ समापन हुनेछ। 

शुभारम्भ कार्यक्रममा गोरखा जिल्लाका जिल्ला न्यायाधीश, पालुङ्गटार नगरपालिकाका नगर प्रमुख, बुटवल उपमहानगरपालिकाको उप प्रमुख, श्री नम्बर ३ बाहिनीका बाहिनीपति, सहायक प्रमुख जिल्ला अधिकारी, जिल्लास्थित सुरक्षा निकाय एवं सरकारी कार्यालयका पदाधिकारीहरू, इतिहासविद्, जनप्रतिनिधि, विभिन्न संघसंस्थाका प्रतिनिधिहरू, सञ्चारकर्मीलगायत सर्वसाधारणको उपस्थिति रहेको थियो।